حاسة بالملل

سلام لبنات رايحة ندخل ديركت في الموضوع انا مخطوبة من فترة وكنت عاملة حسابي بلي رايحة العام هدا في اخرو بالصح تاجل العرس للعام الجاي ديجا كنت كلما نخرج نشري حاجة للجهاز نعمل مفاوضات كبيرة مع خطيبي خاطر مايخلينيش نخرج وفوق الساعتين ماكاش بالرغم من دلك شريت حوايج بالصح درك حاسة روحي مليت من الجهاز ماعدتش قادرة نني نخرج ني نشري حتى باه نستمتع كيما في الاول راحت النفحة خصوصا بعد ما الخياطة كل شهر تقولي تصديرتك توجد نروحلها نلقاها مزالت وفي الاخير اكتشفت انها مازال حتى مابداتش مليت ماعدت حابة نشري والو درك كيفاه نعمل انصحوني

وعليكم السلام

اولا نقلك مبروك عليك وربي يتمملك زواجك على خير وماتتقلقيش كي تأجل العرس كيما يقولو كل عطلة فيها خير ان شاء الله

شوفي اختي هذا هو طبع الانسان بلخف يمل بسبب الروتين والفراغ والحل هو التجديد

بصح قبل كلشي ننصحك بالمحافظة على قراءة القرآن والاذكار اليومية والدعاء باش ينشرح صدرك وترتاحي نفسيا

بالنسبة للتجديد قدامك بزاف حاجات
حاولي تشغلي نفسك بكاش حاجة
مثلا تعلمي خياطة او كروشي او اي اعمال فنية
والنت راهو معمر بهاذو الصوالح تقدري تتعلمي وحدك كيما ورود الساتان والسموكس هاذو حاجات بزاف ممتعة
واذا بديتي فيها رايحة تشغلي كامل وقت فراغك

ممكن ثاني ديري صديقات في النت تحكي معاهم
وكيما قالو الصديق وقت الضيق
انا خطرات نكون في غمة مايعلم بيها غير ربي
وكي ندخل هنا نقصر مع صحاباتي ننسى كلش وينحولي على خاطري

ممكن ثاني مرة على مرة تخرجي مع داركم ام مع خطيبك تغيري جو

اما بالنسبة لموضوع الخياطة
شوفي الخياطة جامي تقوليلها لادات الصح تاع عرسك
دايما قربيلها قد ماتقدري
على خاطر كي يعرفو بلي مزال الحال على العرس يبداو يتعطلو
روحي ليها وقوليلها اذا مزال مابديتيش خلاص اعطيني القماش ونروح عند خياطة اخرى قلها عرسي راهو قريب هكذا تزربلك في حوايجك واذا بقات تتكسل البلاد راهي معمرة خياطات

ماتبقايش تعمري راسك بزاف المفروض هاذي الفترة تاع التجهيزات من اجمل الفترات في حياة الطفلة
وكوني متفائلة وخمي كيفاش رايحة تكون حياتك منبعد مع زوجك

ربي يكملك ان شاء الله ويجمعك مع زوجك في القريب العاجل
وكثري من الدعاء

سلام

اهلا اختي والله قريت رد هاجر عجزت عن الرد قالت كلشي
مبروك اعليك اولا وربي يهنيك وكل عطلة فيها خير ان شاء الله منها تكملي واش بقالك وكلشي بالمكتوب الوقت لي كاتبهولك ربي تتزوجي تتزوجي ماتقلقيش روحك كامل وهاذي قاع جوز على العرايس والعرسان كامل اكونو حابين كلش اجوز تم تم مي للظروف احكام نتي ماتشغليش روحك بحاجات تافهين وماتخليش الشيطان يدخل في تفكيرك وكيما قالت هاجر خمي للمستقبل وحياتك الجديدة وكملي كلش في غرضك ورانا هنا كاشما تحتاجي راه كل واحد بهمو لكن الحمد لله على كلش ربي يعطينا على حساب نيتنا ويهنينا اجمعين يارب

اهلا بيك اختي

ربي يكملك ويهنيك يا رب ويبعد عليك الملل والقلقة

لبنات راهم كفاو ووفاو

حبيت برك نقلك مدامو عرسك تاجل وعمبالي راكي مقلقة من التجهيزات

واكيد مدام عرسك كان اواخر هاد العام راكي موجدة بزاف في جهازك
امالا مدامو تاجل رتحي درك خلي كلش كيما راه ماتزيديش تخممي فيه وماتخرجيش باه تشري هكا تروحلك القلقة منو
كون تبقاي تخممي فيه راح تزيدي تكرهيه اكثر

وكيما قالت هاجر اذا ماكيش خدامة ولا تقراي اشغلي روحك باي اعمال فيها فايدة ليك وتبعدك على الروتين لي يملل
ياك تعرفي كي نبغو نتعلمو حاجة نعودو نهار كامل مشغولين بيها ونحوسو على جديدها هدا ممكن ينحيلك الروتين شوي والملل

وديما الصلاة والاستغفار

ماخلاو والو قالو كلشى .