سلام بنات
مدام راني كملت لقرايا بربي كل مرة نحطلكم وصفة
يعني كي نلقى تفاعل معايا راني منبخلش أوك؟
شفت وصفة دارتها شميشة عجبتني
أنا سرقت منها ودرت طارط أو فراز
المقادير:
العجينة:
200 غ فارينة - 100 غ زبدة - 40 غ سكر - بيضة - رشة ملح
الكريمة:
3 أصفر بيض - 80 غ سكر - 1/4 لتر حليب - شوية كرام فراش - 3 أوراق جيلاتين أو سشية صغيرة جيلاتين بودر (فالأخير نحط الصورة تاعها) - كمية من الفراز
طريقة التحضير:
العجينة:
نخربطو الزبدة مع السكر باليد ولا البيترا لي عندها، ومبعد نزيدو البيضة والملح ونخربطو ونزيدو الفرينة ونخلطوها حتى تولي عجينة
نحطوها في ساشية وندخلوها للفريجيدار نص ساعة
كي نخرجوها نديروها بالقراص ونحطوها فالمول تاع لي طارت ، تحبو تعملو وحدة كبيرة ولا ياسر صغار
أثقبوها بالقرشيطة ودخلوها للفور تبقى 15 حتى 20 دقيقة.
الكريمة:
لاكان راح تستعملو جيلاتين أوراق حطوها في الماء البارد باه تطرا ولاكان جيلاتين بودر خليوها حتى يوصل وقتها.
بالباتور نضربو صفار البيض والسكر حتى يولي لونو أبيض.
نغليو الحليب ونصبوه فوق البيض والسكر لي ضربناه بالباتور ونحطوه فوق النار ونبقاو نحكو حتى تبدا تتخثر ونحيوها من فوق النار.
ملاحظة: لكريمة راهي تبقى جارية متوليش عاقدة كيما لا كرام باتيسيار.
كي تتخثر الكريمة شوية وهي سخونة نحطولها الجيلاتين بعد ما نحيوها من الماء.
نرابيو لفراز قد متحبو ونحطوه فالكريمة ونحركوها.
بالباتور ولا الفوي ولا فرشيطة نضربو شوية لكرام فراش ونزيدوها للكريمة ونحركوها.
ملاحظة: هاذي هي لكريمة بصح أي تبقى جارية مش معناه أي مصلحتش كي ندخلوها للفريجيدار من بعد تولي جامدة.
كي تبرد الطارطة لي درناها نصبو فوقها الكريمة وندخلوها للفريجيدار شوية ومن بعد نطلعوها للكونجيلاتور حتى تجمد لكريمة.
نخرجوها ونزينوها حسب الذوق.
وهاذي النتيجة لي خرجت بيها فالأخير
[ندعوك للتسجيل في المنتدى أو التعريف بنفسك لمعاينة هذه الصورة]نتمنى تجربوها وتعجبكم الفكرة
في انتظار ردودكم
