نصائح من ذهب للعرائس والمتزوجات

نصائح لمن تسكن مع اهل الزوج ادخلي ولن تندمي ''للنساء فقط"

انا اليوم حبيت نفتح معاكم موضوع و نفيدكم بنصائح اللي قدمتهم خالتي ثلجة كي رحت ذاك نهار لعندها.منكذبش عليكم نصائح مكانوش في بالي و مكنتش نخمم فيهم جامي جامي انا اليوم نقدمهملكم ان شاءالله تستفادو و قولولي اذا كنتو مخمين كيما خالتي ثلجة ولا لالا.
1*قاتلي خالتي لازم دائما تخلي روحك بقدرك مع بيت شيخك و تخلي الهيبة نتاعك عندهم بيسك اذا راحت القدر و الهيبة راحو كللللش في كيلة نتاع زيت ههههه
2*قاتلي ديري في بالك باللي الايامات الاولى اهل الزوج يعسو العروسة و يحطو ولهتهم عليها في كلش سيغتو النظافة و الشطارة نتاع الدار
3*قاتلي بالي العروس دائما في اياماتها الاولى من الزواج تشيع عليها كلمة من الكلمتين يا فحلة يا خايبة و اللي شاعت عليها كلمة خايبة حتاااااااااا و اذا حاولت تصلح امورها و تولي ترقع في روحها الله غالب الكلمة كي تفوت و تخرج خلاص يعني اللي شاعت عليها كلمة خايبة معندو مبقا و تلصق فيها للابد مالا يا الشاطرات افحالو على الاقل الايام الاولى حتان تشيع بيكم كلمة فحلة و شاطرة و مبعد دوروها خيابة هههههههههههههههههه
4*النظافة ثم النظافة ثم النظافة و هذه الكلمة حدثتني عليها خالتي ثلجة و خالتي زدوكة للزوج و قراوني مليح شوفو يا بنات
*لازم تبدلي لي درا و مخايد السرير كل يومين و متخليش راجلك يلاحظ الاتساخ نتاع الدرا ولو كان قليلا جدا
*ديري دائما قارورة تنظيف لي مابل و امسحي لاشوبغ كوشوي نتاعك و بعد ما تمسحيها بهذاك الدواء زيدي عاودي امسحيها بمنشفة صغيرة جافة و نضيفة باش ميبقاش هذاك الدث نتاع الدواء في الموبل و يزيد مام يحكم فيهم الغبار
*حاشاكم يا السامعين اقصد القريين ادي معاك بسينة صغيرة نحاسية او حديدية و كل يوم تبدلي الملابس الداخلية نتاعك و اغسليه بماء ميكونش سخون باش ميفزدوش و متغسليش بلومو و لا الجافيل لالا اغسلي بصابون الحجرة راهم لاطباء وصاو و جامي ترمي ملابسك الداخلية في الدوش ولا تخليهم حتان يجي راجلك و يشوف بعينو والله عيب و زيد من جهة اخرى اش على الاقل كي تنشريه وحدو مياثرش ميش كيما تنشري 10 ولا 11 اخاااااااااااااه ذيك التبهديلة يقولو هذ تخليهم بالعام باش تغسلهم مع بعض
و قشك الجديد مثلا القنادر و الجبب و هذيك المشاكل متغسلسهمش في لاماشين جامي تغلطي و تخليهم يتكمشولك اصلا يكونو نضاف ديريلهن تمصميصا و متعصريهم بزاف باش تحافضي عليهم كسع انشريهم
*و كي تنشري قشك اتولهي ليه كي ينشف دخليه متخليش حتان ترشيه الشمس و تاكلو و هو برا منشور يتطايش لالا راهم يتولهو
5*شوفوووووووووووووووووو يا لعرايس خالتي ثلجة قاتلي باللي العروس تعطي لنفسها هيبة و قيمة صدقوني من خلال حركات و تصرفات بسيطة ممكن انا قبل متقولي والله مكنت متولها ليهم شوفو
*جامي تمشي حفيانة قدامهم جامييييي باسك اولا كاين اللي يديرو في بالهم بالي لي تضال تمشي حفيانة ميش نظيفة
*دائما هوي لاشومبر نتاعك على الصباح و افتحي النوافذ للشمس و خرجي قشك برة يتهوا و البكرات داهم بركة يا بنات


*دائما كي تدخلي للمطبخ ديري طابلية القضيان و احكمي شعرك متخليش مطلوق سيغتو في الطياب
*عندكي تغلطي تمسحي في جبتك ولا بيجامتك و نتي في اكوزينة هاي عيني ههههههههههه ديما ديري طرشون صغير في الطابلية امسحي فيه
*و اعطي لروحك هيبة اثناء الاكل تكلمت خالتي زدوكة قاتلي شوووووووفي حنان مرت ولد خالتك يخي متاكلش حتا حاجة غييير لكان خرجتها من البرمة يعني يا بنات متتهرملوش ولا تاكلو الفاضلة ولا تلقاو طبسي فيه شوي اكل خلاه سلفك و لا اي واحد تنوضي طول تهزي تاكلي قداهم لالالا كولي بنظام و اقعدي على الطابلة كي العباد و كولي حاجة بالقدر و كيما قالت خالتي رايحا تكسبي احترام من حوايج بسيطة و مره وحدة ميقولوش او معليش يخي غير فلانة برك خليولها هذيك برك تاكلها لالالالا لازم تفرضي احترامك
*بعد متكملي من الشغل في الليل روحي طوووووووول ادخلي للدوش تدوشي و البسي ثياب للزوج متروحيلوش برائحة البصل و الثوم
*وزيد هدرولي على مرت ولد خالتي هه علابالكم باللي متقعدش غي الارض كيما الناس لالا دائما فوق الكرسي و من هاذ لي جاست مدت لروحها قيمة و كسبت الاحترام نتاعهم هاذي مدة 14 سنة الله يبارك بالصح كلش بيناتهم بالقدر
*و ديري في بالك من اول يوم رايحا تكسبي الاحترام و لا العكس كوني ذات شخصية من اول يوم معاهم
*مثلا شمبرتك ليم انتي و راجلك فقططططططططططططط ميش من هب و دب يدخلها اياك و اياك
و وحدة بكري قالك تزوجت صغيرة في دار النسا يعني دار معمرة بالنسا مقدرتش خلاص و هوما فوحل راحت لامها قالتلها يا ما راني قد مدرت مقدرتش للقضيان راهم نساهم في بزاف قالتلها مها يا بنتي لا هوما غلبوك بالكثرات نتي اغلبيهم بالبكرات و السهرات يعني الصباح بارك فيه ربي و اقضي شغلك الصباح ديما كون تصيبي و في الليل ثاني كي تكوني مكي تديري فوالو طبقي قشك و ديري امورك و متنسايش العجوز راها تحب تتطفل في الايامات الاولى على العروس في الغرفة يعني تشوف الحطة والنظافة والاحوال لازم تنتبهي .

*و قاتلي خالتي بلا منوصيك على اسرارك و لازم تحترمي راجلك قدامهم و اكيد لاااااااااااااااازم تعلميه يحترمك قدامهم بيسك يا بنات اللي ميقيمش مرتو قدام اهلو راهم اهلو ميقيموهاش هاذي حطوها في بالكم يعني لازم ديما مقيمك و مكبر بيك باش هوما ثاني يديرولك حساب ان شاءلله تفهمو قصدي.


*و حتا للي رايحا تسكن وحدها لازم تحط هاذو النقاط بعين الاعتبار بين عينيها بيسك راها رايحا تمضي الايامات الاولى رايحا جاية على دار شيخها
*بنات متنساوش الجوارب نتاع راجلك لازم يوميا تغسليلو الجورب نتاعو و تسيرجي الصباط و تحطيهملو في الليل واجدين باش غدوة يروح للعمل و يكون كلش واجد متخليش اهلو ينتبهو و يقولو مهملاتو لازم ديما يشعل شعيل
*و حاولي ديما تنوضي قبلو و توجديلو فطورو و كل مايحتاجو باش يروح يخدم
و الجوكينغ او سيغفاتمون اللي يلبسها كي يكون قاعد ولا في الليل متنسايش تتفكري تغسليها كل 3 ايام ولا يومين متضربيش النح عليه يا طفلة
*و كي يدخل راجلك للبيت دائما اساليه وش يحتاج ووش ياكل ولا كشما يسحق


المهم ان شاءالله يكونو عجبوكم نصائح خالتي ثلجة هههههههه و ربي يهنيكم.

منــــــــــــــــــــــــقوول للامانة