المعتقدات القديمة و الفال في حياتنا اليومية

السلام عليكم بنات
اليوم حبيت نقترح عليكم موضوع اراه شيق الا و هو معتقدات جداتنا 
و كذا الاشياء لي نعتبروها فال زين و الاشياء اللي نعتبرها فال ماشي مليح
ارجو من كل الاخوات المشاركة حتى تعم الفائدة و يحدث تبادل في ثقافتنا و عاداتنا و معتقداتنا

شكرا ليك اختي علئ الموضوع اراه شيق 
لي عودة

واش يقول الفال مثلا كي يسيح الملح في الارض؟؟
خير ام شر؟؟

اوكي اختي انتظر مشاركتك

احنا نقولو القهوة كي تتفرغ يقولو للربح

شوفي أختي بالرغم من أنو هاذي حكايات الفال رانا نهدروها ياسر في حياتنا اليومية

مي راهي شرك بالله و حرام كيما هاذيك تاع صبّحت على فلان يعني نهاري يعدّي يا لطيف

ولا نطيّش الملح فوق راس ولدي باه تحميه العين و السينوج الأكحل يرموه فالعراس يبعدو بيه العين

هي عادات قديمة و يحبوّها الناس الكبار تبانلهم هي لي راهي تحمينا مي راهي غير خرطي ههههههههه


شكرا على الموضوع أختي

مشكورة الاخت على التوضيح
انا ادري انو هاذ الشيء لا اساس له في الدين
لكن اردت فقط تبادل معتقداتنا تع زمان هاذا هدف الموضوع

ياسيدي عمبالنا شرك راي تقلكم برك وش تعرفو يعني وش سمعتو من العادات


انا والله نديرها تاع الملح هكاك يقولو تبعد العيد خلاص الولاد الصغار في النهار كي يجو ضياف ويتفرجو فيهم في اللليل يباتو يعيطو نسبعلهم الملح
ههههههه


كي نتفكر حاجة نرجع

موضوع مليح بصح راني لاعلاقة بهاذ لحوايج

كشما نروح عند جداتي نجيب شوية لقطات من عندها ونقلكم هههههههههههه

ههههههههههههه تفكرت حاجة

بما أني ضرك كنت قاعدة نخيط في حوايج تفكرت جداتي

قاتلي كي يأذن المغرب حبسي لخياطة مدة حتى ساعة ومباعد أرجعي خيطي على روحك

سقسيتها وعلاه ؟ قاتلي قتلك متخيطيش وبرك متحوسيش تفهمي ياسر ههههههههههه

لاكان عندكم معلومة وعلاه قولولي هههههههههههههههه

أوكي أختي فهمت الموضوع تالمون مانحبهمش اللقطات هادو ماحبيتش نهدرهم برك

شوفي نعطيك وحدة: عندنا جارتنا كبيرة و جداتي كي يشوفونا مراض بلا سبب يقولك بالاك ضربوها بعين

 ايه مالا يجربو واحد العفسة: يحكمو عود خشبية ماشي طويلة و يلفّو عليها قطعة قماش نظيفة 

و يدوّروها على الشخص هذاك و يقراو عليه ماعلاباليش واش يقراو هههههههه 

المهمّ شويّة و يحلّوها لاكان طاح القماش يقولك شفتي ؟؟ راهي عين. القماش كانت مربوطة على العود 

كيفاش طاحت ؟؟ طيحتها العين هههههههههههه و إذا ماطاحتش بقات حاكمة يقولو مالا راهي مريضة صح 

ههههههههههههههههههههه أنا كي ادّيرها جداتي ولا جارتنا يضربني الجنّ أعوذ بالله ماتعجبنيش

مي جامي داروهالي ليّا

وقل لن يصيبنا الا ما كتب الله لنا 

ياختي بلادنا راهي معمرة بالمعتقدات هادي 

تاع الملح مانعرفهاش 

نمدلك شوية من المعتقدات اللي نعرف : تاع تسبعي بالملخ اوووههه هادي رائجة و بكثرة تبعد العين كي تسيح حاجة في الارض خاصة القهوة او الحليب او الماء خاصة هادو يقلك مليح ساح الخير 

كوكي انا سمعتها في الجامهة ماتخيطيش من وراء المغرب يقلك راكي تخيطي في الكفن تاعك 

كي يسمعوا الابقار او الثيران يعيطوا يقولو راح يموت شخص على الاقل

كي يصبحوا على قطة كحلة يقلك يعدي نهار ماشي مليح

كي يسمعوا خبر ماشي مليح يضرب الخشب باش مايصرالهمش نفس الشئ 

وو القائمة طويلة 

كاش ما نتفكر نرجع

ههههههههههههههههههههههه عينيا هاذيك تاع العود

دارتها يمى هاذيك المرة يعني جداتي دارتهالي وأنا ميتة بالضحك

قتلها قوليلي برك واش قاعدة تقولي قاتلي مدخلكش خخخخخخخخخخ

ظهرتلي ماهي تقول في والو يخرلاطو علينا برك ههههههههههه

اشكر جميع العضوات على التفاعل مع الموضوع
كما اشكر الاخوات الحريصات و الغيورات على دينهن
لكن احب ان اقول اننا لسنا اقل غيرة و حيا لديننا الحنيف 
فانا شخصيا خريجة ماجستير علوم شرعية تخصص اصول الفقه
لكن طرحي للموضوع لم يكن له اي خلفية اخرى
شكرا مرة اخرى

العفو أختي بلا مزية و شكرا ليك نتي ثاني على الموضوع 

هكا نتبادلو المعارف و لي كانت ماتعلمش بحاجات حنا نعلموها

و بدورنا نشكرك اختي ريتا على الطرح القيم و نتمنى ان تزول هذه المعتقدات القديمة و التي لا تمت بالاسلام باي صلة 

و  اظن فهمنا مقصدك الا و هو التعرف عى بعض من تخاريف بلادنا المضحكة بالطبع