يوميات فتاة جامعية جزائرية، مضحكة ،جميلة- حتى الادمان نهاية القصة

♥♥ عدد المساهمات : 21453 تاريخ التسجيل : 08/11/2010

السلام عليكم

قبل إمتحان الاول دينا العطلة تع 15 يوم وبما انو خالي كان مسافر ومخلي
مرتو وولادها وحدهم رحت عندها باش نونسها وكي وصلت لقيت تم زوج خواتاتها
سلفيات وملتزمات انا في الحقيقة ماكنتش نبغيهم خاطر نحسهم بزاف متشددات [ندعوك للتسجيل في المنتدى أو التعريف بنفسك لمعاينة هذه الصورة]ومايتفرجو
لا مسلسل لا اغاني لا ستار اكاديمي وكامل هدرتهم يجوز ولا يجوز تنفست بعمق
وقلت ربي يجيب الخير وبعدما كنت مقرة نفوت كامل ال 15 يوم عندها قلتها بلي
جيت نفوت يومين او ثلاثة ونرجع ومن وقت لي وصلت وانا نقول في قلبي كيفاش
ندير مع مسلسل تع ال7[ندعوك للتسجيل في المنتدى أو التعريف بنفسك لمعاينة هذه الصورة]
لي راني متبعاتو والله الحلقة تع اليوم مهمة بزاف ومانعرف ايلا البطلة
تتصالح مع البطل ولا تتزوج بهذاك البهلول لي راه يتبع فيها اواه انا
نخرجهالهم عيني عينك ونقلهم على ال7 تنجمو تخرجو وتخلوني نتفرج؟؟ وقبل ما
ننطق لقيت وحدة فيهم تقلي اليوم على 6.30 نشوفو محمود المصري وسقساوني ايلا
نعرفو ؟؟
انا وقتها كنت نخمم في المسلسل قتلهم لالا اه ايه هذا مصري اكيد وفي قلبي كنت نقول زعما كامل مالقاوش وقت غير لي قريب للمسلسل تاعي[ندعوك للتسجيل في المنتدى أو التعريف بنفسك لمعاينة هذه الصورة]
جات ال 6.30 وبدات الحلقة تع الشيخ محمود المصري خلعوني كيفاش شفتهم فرحو
بيها وسكتو كامل تقول انا كي تلحق لقطة مهمة في المسلسل تاعي بصح هوما كانو
احسن مني كانو مايفوتو حتى كلمة انا كنت نسمع ليه بصح مرة على مرة نقيس
عيني على الساعة ونشوف ايلا لحقت ال7 وكي لحقت مديت يدي حكمت
الtelecommande ودرت روحي دركت القفلة غلطة ودرت القناة تع المسلسل وهوما
طارو كامل في مرة رجعي[ندعوك للتسجيل في المنتدى أو التعريف بنفسك لمعاينة هذه الصورة] شكون لي بدل ووحدة بدات تقول اعوذ بالله من الشيطان الرجيم وانا طبعا هذاك الوقت وجهي تلون بكل الوان الطيف [ندعوك للتسجيل في المنتدى أو التعريف بنفسك لمعاينة هذه الصورة]وحسيت روحي انا لي راهم يتعوذو مني بديت نقلهم سمحولي ماشي بلعاني رجعو رجعو عمي الشيخ شحال يعرف يهدر وحنين مسكين

هكذا فات اول يوم ليا في دار خالي رحت زعما نديفولي على روحي عشيت وسط
جماعة من المشايخ وكل نقاشاتهم وهدرتهم على واش قال الشيخ الفلاني وواش
افتى الشيخ الفلاني وانا كنت ضايعة في وسط هذو الاقوال والفتاوى تقول جيت
من عالم اخر[ندعوك للتسجيل في المنتدى أو التعريف بنفسك لمعاينة هذه الصورة]
في اليوم الثاني قعدنا بعدما خلصنا شغل الدار باش نشوفو تلفزيون و بداو
يحوسو على كاش شيخ في احد القنوات الدينية باش يشوفوه بصح مالقاو حتى شيخ
قلتلهم ايلا مالقيتوش واش تشوفو كاين عندي وحد الفيلم شفت اشهار تاعو يكون
يلعب ضروك قالولي ايلا تبغي تتفرجيه معليش بصح احنا نوضو نقعدو وحدنا لهيك
في الصالون وبما اني كنت كارهة منهم قلتلهم كيما تبغو ودرت الفيلم لي كان
بزاف شباب ويقتل بالضحك وكي خلاص الفيلم حسيت بتأنيب الضمير وقلت في قلبي
زعما يكونو هوما غالطين وانا لي صح أكيد هوما عندهم حق وبديت نتفكر في هدرة
محمود المصري البارح على الجنة والنار بصح تم تم لعبلي الشيطان في راسي
وقالي ربي غفور رحيم وانا واش درت شفت فيلم وضحكت وديفوليت على روحي مارحش
ندفن روحي بالحياة الواحد يعيش حياتو ومايديرش الصوالح لي ما يغفرهملوش ربي
اما الباقي كلو يتصلح
كي جيت خارجة توقعت نلقاهم معادييني ومايبغوش يهدرو معايا بصح تفاجئت كي
لقيتهم عادي يحكو و يضحكو قلت في قلبي يعني ماشي غير انا لي نحيت على خاطري
وديفوليت هاهم هوما بلا مايشوفو فيلم راهم فرحانين[ندعوك للتسجيل في المنتدى أو التعريف بنفسك لمعاينة هذه الصورة]
في اليوم الثالث كنت مقررة نروح للدار العشية وهوما كانو يشدو فيا ويقولولي
وعلاه تروحي مازالت العطلة زيدي اقعدي معانا ماتوقعتش يشدوني خاصة اني كنت
بعيدة بزاف عليهم انا نبغي الغنا والافلام ومانعرفش المشايخ لي يعرفوهم
هوما ويحكو عليهم ولا مرة دخلت معاهم في نقاشاتهم ومع ذلك راهم يشدو فيا
والله استعجبت بصح كنت مصرة اني نروح و وقت المقيل قلت ماعندي مانتفرج كي
راهم حاكمين الtelecomande نرقد خيرلي قعدت في بلاصتي ودرت kit men في وذني
وشعلت ال mp3 باش نسمع شوية غنا قبل ما نرقد وكي جات رح تديني النومة تنحى
الخيط من وذني ولقيت روحي نسمع في شيخ يحكي في قصص من الواقع على ناس
كيفاش تابت وكيفاش كانو منحرفين ورجعو للسراط المستقيم في الاول بديت نحوس
كيفاش نرجع الخيط بصح كي لقيت الخيط ماقدرتش نحطو في وذني خاطر عجبتني هدرة
الشيخ هذاك وقعدت نسمع فيه كي كمل نضت وقلتهلم شكون هذا الشيخ عجبتني بزاف
هدرتو قالولي هذا اسمو الدكتور عبد الرحمن العريفي حسيت وقتها قلبي رح
ينفجر حسيت بحياتي بقات فيها لحظات وتكمل ومابقاش قدامي بزاف وقت باش نتوب
ونرجع للطريق المستقيم

وصلى اللهم وسلم على سيدنا محمد

merci sara

♥♥ عدد المساهمات : 21453 تاريخ التسجيل : 08/11/2010

السلام عليكم
قضيت كامل العشية وانا ساكتة ونخمم [ندعوك للتسجيل في المنتدى أو التعريف بنفسك لمعاينة هذه الصورة]وبعد
لي كنت معولة نروح للدار رجعت في رايي وقلت نزيد نقعد يامات مع لبنات باش
نستفيد منهم اكثر وهذيك الليلة ماجانيش الرقاد وقعدت نتقلب في بلاصتي وكل
دقيقة نتفكر واش درت وكيفاش كنت بعيدة على ربي وناسية بلي كاين الموت
والآخرة وناسية الوقفة بين يدي الله كل هذي الحاجات خلاتني نخاف اكثر واكثر
وما خففش عليا هذاك الخوف غير هدرة سعاد اخت مرت خالي حست بيا بلي مزال
مانرقد وبدات تقلي ربي غفور رحيم ويقبل التوبة من عباده مهما كانت ذنوبهم
وبلي كاين ناس قتلو وارتكبو معاصي وكبائر ونهار رجعو لله بقلب سليم تائب
ومخلص غفرلهم ربي سبحانو كل ذنوبهم وبدلها بالحسنات كلماتها دخلت قلبي
وخلاتني نريح وزادت نصحتني باش نعلن توبتي وقتها حسبت راهي تقلي اخرجي قدام
الناس ولا في كاش جامع واعلني بلي كنتي رح توبي لله قلتها اوااااه مانقدرش
عليها هذي صعيبة عليا والله نموت بالحشمة ضحكت عليا وقالتلي بلي ماشي قدام
الغاشي واش راحلهم هوما فيك اعلني توبتك قدام رب العباد وكي سقسيتها كيفاش
قالتلي صلي ركعتين واستغفري فيهم ربي من كل ذنوبك لي فاتت وتاكدي بلي ربي
سبحانه هو الرحمن الرحيم قابل التوب وغافر الذنب
درت عليها ونضت توضيت ووقفت بين يدي الله ولأول مرة نحس أني واقفة في
الصلاة بكل جوارجي اختلطت في قلبي كل الاحاسيس حسيت بالخوف والندم والثقة
في رحمة الله تمنيت تتوقف الساعة والحياة في هذيك اللحظة بكيت وبكيت وبلا
مانحس كانت الدموع تخرج من عنيا وتتدفق فات بين عنيا شريط الذكريات وكلما
نتفكر ذنب نبكي اكثر ونستغفر وبعدما خلصت الصلاة والدعاء حسيت براحة عمري
ماحسيت بيها من قبل وبلخف رقدت حتى اذن الفجر نوضتني أميمة اخت مرت خالي
للصلاة
صلاة الفجر شحال من مرة كنت نسمع فيها الآذان ونتهاون ونقول ضروك نوض وما
نوضش حتى يطلع الصباح اليوم بعدما صليتها حلفت بلي عمري مانزيد نفرط فيها
لأني حسيت بحلاوة وسعادة كنت غافلة عليها سنوات من عمري
طلع الصباح ومن وقت فطنو سعاد وأميمة وانا نسقسي فيهم على سبب التزامهم
وحياتهم بعد الالتزام والقنوات لي يتفرجوها و نظرة الناس ليهم بعد الالتزام
وكل اسئلتي لقيتلها اجوبة مرات كانت تقنعني ومرات كانت تخوفني بصح اكيد
ماكنتش رح نتراجع انما كان لازم نكون قوية باش نقدر نواجه[ندعوك للتسجيل في المنتدى أو التعريف بنفسك لمعاينة هذه الصورة]
فوت ايام وقررت باش نرجع للدار و نقعد مع نفسي اكثر ماكنتش قادرة نبين قدام
دارنا التزامي وليت كي نشوفهم دارو فيلم او مسلسل نخرج وندير روحي نقضي في
كاش حاجة وكي نسمعهم دارو الغنا نقلهم ينقصولو وبعد ايام حسو بيا كامل
وبداو يقولولي بلي تبدلت ووليت منطوية وما نبغيش نقعد معاهم وتماك قلتلهم
الحقيقة بلي رح نبطل نشوف افلام ومسلسلات ونبطل نسمع الغنا وبما انو عائلتي
ناس ديمقراطيين اعطاوني حرية الاختيار اما اكثر شخص فرح بيا وشجعني هو ابي
قالي اذا راكي حاسة نفسك مقتنعة بهذي الهدرة نقلك بارك الله فيك وربي
يثبتك بصح ردي بالك تكون مجرد خرجة من خرجاتك ومن بعد ترجعي في رايك الدين
مافيهش اللعب يابنتي
بعدما كملت العطلة تع 15 يوم رجعت للجامعة وهذي المرة بعقلية جديدة لبست
حجاب كان عندي كنت نلبسو غير في الايام لي مايكونش جاي في بالي نستيكي روحي
حوست عليه ولبستو وطلبت من بابا يعطيلي باش نشري واحد اخر نبدل بيناتهم
كنت متوقعة يكون رد بابا كي العادة: راهي قريب تدخل la bourse واشري على
روحك
بصح هذي المرة كان عكس ماتوقعت اعطالي وقالي خير ماعملتي
في الجامعة وليت مانبغيش نحكي مع لولاد لي يقراو معانا ومانقعدتش بزاف غير
نكمل القراية نرجع للدار وحتى صحاباتي فاطيمة وفتيحة ورزيقة وليت جابدة
عليهم ونتقلق منهم كي نلقاهم يسمعو في الغنا وهوما حسو بيا وبداو يتقلقو
مني خاطر تبدلت عليهم بصح انا ماكانش يهمني نظرتهم ليا لاني كنت مقتنعة اني
على صح وهوما لي غالطين
وليت نحس انهم في طريق الظلال لي كنت انا من قبل فيه وكل مانقعد معاهم
نتفكر روحي كيفاش كنت ونحس بالندم على هذاك قررت نبعد عليهم على قد ما نقدر
هكذا باش ما نرجعش لواش كنت خاصة كي ماقدرتش نقنعهم بالشي لي راني مقتنعة
بيه وبدات كل نقاشاتي معاهم تنتهي بالعياط والزعاف ومانخرجو بحتى نتيجة
اما في الدار فماكنش عندي كيفاش نهرب من اسئلة اختي هذيك الاسئلة كانت
تستفزني دايما على خاطر ماكانتش عندي الاجابات الشافية والكافية عليها
ووليت نتفرج طول الوقت على المشايخ ونظل نتنقل بين القنوات الدينية باش
نلقى اجوبة لكل اسئلتها لأني كنت مقتنعة بحاجات من نفسي وخلاص وماكمنتش
محتاجة لدليل من القرآن او السنة هذاك شيئ رباني دخل قلبي وخلاني نتقبل اي
شي نحسو يقربني من ربي حاولت نعرف كل العبادات والنوافل لي نتقرب بيها لله
ومرات نزيد من عندي باش نعوض لي فات كنت نقول زعما كي نقوي العبادات اكثر
نعوض الايام لي فاتتني

وفاتت الايام وكل يوم يزيد التزامي وجاء وقت الامتحان كنت قررت اني مارحش
نغش خلاص وهذا القرار بلغت بيه صحاباتي واكيد ماعجبهمش الحال وحاولوا
يقنعوني بلي احنا ماراناش نغشو احنا رانا برك نتعاونو خاطر الدروس قاوية
وصعيبة وعلى هذاك نتقاسموها في الحفظ وهذا ما اسموش غش

بصح انا اكيد ما اقتنعتش بهدرتهم هذي وفي للإمتحانات وليت نقعد وحدي في
الطابلة الأولى ونقرى الادعية والاذكار لي حفظتهم وتوكلت على ربي وكل ما
يطيح ال sujet في يدي نحط راسي ونبقى نجاوب وحدي لي نعرفها نديرها ولي
مانعرفهاش نحاول نتفكرها واذا ماقدرتش نخليها ونقول ربي يعوضني المهم ما
نننقلش ولا نغش بصح مرات كنت كي نلقى روحي حاصلة في بزاف اسئلة نتفكر ايام
التعاون و الاجوبة الجماعية خاصة كي نسمعهم في اخر القسم يهدرو ويتبادلو
الاجوبة بيناتهم والحمد لله اني بلخف نرجع لوعيي ونقول الله يلعنك يا ابليس
ونجاوب على حساب معرفتي وفهامتي ونخلي الباقي على ربي
وصلى اللهم وسلم على سيدنا محمد

MERCI SARA

سارة وين راهي البقية
ولا نسيتينا و خليتينا هكاك

مشكورة سارة

♥♥ عدد المساهمات : 21453 تاريخ التسجيل : 08/11/2010

هههههههه راني نسيتها قاع اوك سمية ماتلومينيش دوك شوية نحط

♥♥ عدد المساهمات : 21453 تاريخ التسجيل : 08/11/2010

بلا مزية هبة

♥♥ عدد المساهمات : 21453 تاريخ التسجيل : 08/11/2010

السلام عليكم

بدات تتغير حياتي جذريا وكنت فرحانة ومرتاحة لهذا التغيير قررت اني ندير
حجاب شرعي يعني ندير خمار طويل يستر كامل الجسم وحجاب فضفاض وكهذا نتهنى من
ناحية اللباس واول مرة كي خرجت بيه حسيت بالفرق واضح في معاملة الناس ليا
يعني زادت درجة الاحترام وريحت من هذيك النظرات والتعليقات لي تؤذي صاحبها
وسامعها في نفس الوقت اما صحاباتي كي شافوني ما امنوش وقالولي وعلاه درتيه
زعما لي كنتي لابساتو ماكانش حجاب حاولت نقنعهم بوجة نظري بصح من غير فائدة
والاولاد لي يقراو معايا قالولي غير الخير كاش واحد ماتلك ولا راكي مريضة
وعلاه تبدلتي كامل هكذا زعما كلي برك لي يموتلو شخص عزيز عليه او يحس روحو
هو رح يموت لي يرجع للطريق ويتوب وبخصوص الافلام والمسلسلات الحمد لله لقيت
عنهم البديل في القنوات الدينية والاغاني عوضتهم بالاناشيد وزدت نقصت تاني
من قعدتي في الجامعة ووليت نقعد اكثر في الدار مرات كنت نحس روحي غريبة
خسرت بزاف حاجات كنت نستمتع بيها صحاباتي الكليلة لي كنت نفوت معاهم اجمل
الاوقات الضحك واللعب والحكايات مع الاولاد رجعت منطوية بصح كنت تم تم
نتفكر ربي وبلي راني في الطريق الصحيح وهذو ما هم الا معوقات لازم ما ندورش
ليهم ومانخليهمش يجبدوني ولي خلاني نصر اكثر على موقفي هو نتائجي في
الامتحان لي كانت كلها مابين 10 و 13 يعني افضل نتائج حققتها من يوم لي
دخلت للجامعة وقدرت نجيب العام بفضل الله

متابعتي للمواعظ والخطب خلاتني نتثقف في امور الدين لي كنت مانعرف فيها غير
اركان الاسلام الخمسة وكنت كل مانعرف حاجة نبغي نطبقها تم تم كان عندي
اقبال كبير على كل حاجة نحسها تقربني من الله اكثر وخاصة كي قرب شهر رمضان
استعديتلو احسن استعداد نفسي ومعنوي وبما انو كان عندي رصيد ايماني كبير
وقابليتي لكل انواع العبادات كانت مفتوحة كنت فرحانة بزاف بهذا الشهر لي
حسيت ولأول مرة اني مانيش نستنى فيه باش نشوف المسلسل الفلاني او الحصة
الفلانية انما فقط باش نحس اكثر بحلاوة الايمان والقرب من الله
قررت في هذا رمضان اني نروح للجامع ونصلي التراويح وفي أول ايام رمضان فوت
كامل اليوم بين كتاب القرآن والصلاة وحتى كي كنت نطيب في الفطور كنت نستغل
الوقت في الذكر والاستغفار وفي الليل جاء الوقت باش نروح للصلاة لبست حجابي
وقلت لبابا يستناني باش نروح معاه وفي الطريق بديت نقول في قلبي دعاء
الذهاب للمسجد وكي لحقنا بابا قالي منا تروحي تلقاي المصلى تع النساء بصح
انا ماسمعتوش وبقيت نتبع فيه حتى لقيت روحي في وسط الرجال قلتلو وين يصلو
النسا ؟؟ بابا انخلع كي لقاني من وراه وبدا يزقي عليا وسط الجامع ويقولي
وين راكي جاية مورايا انا جبتك تصلي مع النسا راكي باغية تصلي بينا في
بلاصة الإمام وعاود رجع معايا وقالي من هنا يصلو النسا وكي نرجعو للدار
نتفاهمو عليها
بصح كي رجعنا للدار نسى وبدا يقولي ايلا عجبتني الحالة او لا وزعق عليا وقالي وقيلة صليتي انتي بيهم

في الحقيقة الصلاة في الجامع كان عندها طعم مختلف ورمضان لي فوتو هذا العام
كان احسن رمضان في حياتي ختمت القرآن 6 مرات وحفظت 5 اجزاء وبعض الأحاديث
القدسية وتعلمت كيفاش ننظم حياتي على ضوء القرآن والسنة وكيفاش نخلي اول
اهتمامي هو رضا الله بصح الشي لي نسيتو او تناسيتو عمدا هو اهلي والناس لي
كنت عايشة وسطهم كنت انانية وفكرت برك في روحي و شحال من مرة كنت نتعامل
معاهم بطريقة سيئة وانعزالي وانطوائي على نفسي خلى بيني وبينهم فجوة
ماكانتش من قبل وهذا الشي خلاهم ينفرو مني ومن الالتزام بصفة عامة مع الوقت
كي حسيت بلي تصالحت مع نفسي وتقربت اكثر من الله بديت نحس بلي فسدت علاقتي
بالناس ووليت نعاملهم على انهم عاصيين وكلهم منحرفين عن السراط وهذا الشي
كان يسببلي مشاكل مع اقرب الناس ليا و اولهم اختي لي كنت اكثر من مرة
نطفييلها التلفزيون ونزقي عليها ونقلها هذا لي راكي تشوفي فيه حرام ولازم
تبطلي وتتوبي لله ونسيت بأني من فترة قصيرة كنت حافظة كل برامج القنوات
واوقات المسلسلات و وقتها بديت نقعد مع روحي ونحاول نراجع نفسي لأني بيني
وبين روحي حسيت بلي راني غالطة ولازم نغير معاملتي مع الناس للأحسن

وصلى اللهم وسلم على سيدنا محمد

♥♥ عدد المساهمات : 21453 تاريخ التسجيل : 08/11/2010

السلام عليكم

مهم بزاف تكون علاقتك مع الله مليحة وتكوني صافية وضميرك مرتاح بصح مهم تان
تكون علاقتك مع الناس وخاصة لي قراب ليك مليحة وعلى هذاك كنت مع كل لي
درتو باش نقرب من الله محتاجة لشيئ اخر باش تكمل فرحتي وراحتي النفسية وهذا
الشي كان هو قربي من الناس وخاصة اهلي و صحاباتي يعني اقرب الناس ليا ولي
خلاني نتأكد اكثر من هذي الفكرة كي شفت برنامج تع مصطفى حسني وسمعتو يقول
كيف لازم الانسان يعامل خلق الله بما يحب ان يعامله الله به وانو الواحد
باش يكتمل ايمانو لازم يعيش وسط الناس ويتحمل اذاهم ويحاول يصلحهم بالتي هي
احسن تعلمت منو بزاف حاجات وخلاني نرتاح اكثر ونلقى الحل لي بيه نرجع نكسب
اهلي وصحاباتي ونعطيلهم صورة احسن عن الالتزام والملتزمين

بديت نتقرب من جديد من اختي ونحاول نتعامل معاها كيما كنت من قبل ومرة على
مرة كي نكونو نتفرجو ندير شيخ من المشايخ لي نبغيهم ونخليها تشوف معايا ومع
الوقت بدات توالف وعقلها يتقبل هذا المواعظ وتدريجيا بدات ماتشوفش
المسلسلات ولا الافلام وبطلت حتى الغنا والمفاجاة الهايلة انها لبست الحجاب
الشرعي فرحت بزاف بيها وولينا زوج في الدار يعني خيرمن كي كنت وحدي وكان
بابا مسكين افضل مساند لينا واول حاجة درناها انا واختي طلبنا من بابا يمسح
كامل القنوات تع الافلام والاغاني ويخلي برك قنوات الدينية والعامة لي
مافيهاش حاجات مخلة بالحياء بصح وقتها ماوليناش نلقاو دايما واش نتفرجو
خاصة واننا كنا في العطلة الصيفية وايام الصيف طويلة ومملة على هذاك بدينا
نقراو الكتب الدينية لي كانت في مكتبة ابي وهو عمرو ما رفض يعطيلنا كتاب مع
انو كانو بزاف عزاز عليه بصح كي حس انو رانا في الطريق الصحيح حب يعاونا
وزاد اقترح علينا يدخل الانترنت وهذي كانت اجمل هدية من عند ابي الحنون

فرحت بزاف على خاطر من بكري كنت نتمنى تكون عندي انترنت في الدار واخيرا
بابا قبل وهو من نفسو اقترح علينا ندخلوها وبعد شهر دخلنا الانترنت وكي
العادة كان لازم نجتمعو كل افراد العائلة باش السيد بابا يحط الشروط
والبنود لي لازم نقبلوها من الاول والشروط كانت هي اننا نستعملوها اولا في
ما يرضي الله وللدراسة واذا تراجع مسوى الدراسي لاي واحد فينا ينحرم الجميع
من الانترنت ويصنع توقيت لكل العائلة كل واحد عندو وقت محدد يقعد فيه وكي
يخلاص وقتو ينوض ويخلي اللي بعدو وذا صرات مشاكل بينا نتعاقبو يوم كامل
ننحرمو من الانترنت الشروط كانت واضحة ومحددة و قبلناها واحنا فرحانين انا
في البداية كنت نقول ايه حتى بابا وماما وراهم دخلو معانا في التوقيت زعما
اكيد ماراحش يقعدو بصح لقيت بلي كنت غالطة في حساباتي وكي يلحق وقت بابا او
ماما نلقاهم واقفين على راسي ويستناو باش نوض

بعد العطلة الصيفية دخلت للجامعة في السنة الأخيرة ليا وهذا كان اكثر شيئ
مفرحني يعني بقالي سنة وحدة ونودع الجامعة كل صحاباتي كانو يقولو رح نتوحشو
الجامعة وياماتها الا انا لي كنت نعد في الايام باش نتهنى منها مع اني
ماشفت فيها الا كل خير بصح ماعرفتش علاه حسيت روحي تعبت بزاف من القرايا
ممكن لأني من وقت لي نعقل على روحي وانا نقرى يعني بعد 17 سنة دراسة الواحد
من حقو يرتاح

علاقتي بصحاباتي كانت مزالها في توتر دائم وكان من الصعب ترجع المياه
لمجاريها خاصة بعدما زاد التزامي والوحيدة لي كنت نحسها تتقبل فيا بالعقل
هي فاطيمة رغم الاختلاف لي بيني وبينها كانت دايما تحافظ على هدوء اعصابها
معايا وتعاملني بما يرضيني ومن وقت عرفت اني ماوليتش نسمع الغنا عمرها ما
شعلت قدامي غنية بالعكس كي تكون تسمع وتشوفني جيت تطفيها على هذاك كنت
دايما نقعد معاها اكثر شي مع انو بدات وجهات النظر تاعنا تختلف بصح كنت
نلقى بعض المواضيع المشتركة لي نقدرو نحكو فيها ومع الوقت بدات تكون هي
افضل صديقة ليا لأنها الوحيدة لي فهمتني وتقبلت التغير لي حدث في حياتي
وساندتني ووقفت معايا زاد حبي ليها اكثر وحاولت دايما ننصحها بصح بلا
مانظغط عليها ومع الوقت حسيتها بدات تبعد على الغنا والمسلسلات وبعدما
خطبها هذاك لي كانت تحكي معاه في تلفون دارت حجاب فرحتلها بزاف وتمينت ربي
يهنيها ويحفظها

في الدار كنا كلنا ماشيين على الاتفاق لي عقدناه مع بابا وانا اول حاجة
درتها اني سجلت في منتديات اسلامية وبديت نبحث عن مواقع اسلامية وكل
ماتغيبلي في فتوى او امر من امور الدين او حتى الدنيا نروح للانترنت وفي
المواقع الاسلامية بديت نتعرف ونتعامل مع بنات ملتزمات ومتدينات وبدات تنشأ
بيني وبينهم صداقة وعلاقة محبة واخوة في الله

وصلى اللهم وسلم على سيدنا محمد

merci sara

شكرا سارة
خلاصو اليوميات؟

♥♥ عدد المساهمات : 21453 تاريخ التسجيل : 08/11/2010

لالا مزالو نسيتها

[ندعوك للتسجيل في المنتدى أو التعريف بنفسك لمعاينة هذه الصورة] lol!

في انتظار البقية

رانا في الانتظار سارة

اممممممم روعة
هدا وين فقت بهاد اليويات ما كنتش عارفة باللي راكي حاطتهم
جبت النهار كامل و انا معاهم

والله روووووعة
عجبتني نتاع القوانين باش تدخل النترنات [ندعوك للتسجيل في المنتدى أو التعريف بنفسك لمعاينة هذه الصورة]
والله اونديري بابا هههههههه
في انتظار البقية
وشكرا

♥♥ عدد المساهمات : 21453 تاريخ التسجيل : 08/11/2010

اوك دوك نحط اسمحولي

اهلا بيك سامية ههههه

♥♥ عدد المساهمات : 21453 تاريخ التسجيل : 08/11/2010

السلام عليكم

في المنتديات الاسلامية وليت نلقى راحتي اكثر خاصة لما نتلكم مع بنات نحسهم
يفكرو مثلي ويحسو بيا لقيت لي فقدتو في الجامعة الصحبة والشلة الملتزمة
ولي ماتحسسنيش بالنقص او بأني راني نبالغ في تديني كنت نحكي معاهم في
مواضيع مختلفة ونتناقشو وحتى اختلافنا في وجهات النظر كان منظبط و كل وحدة
تعبر على رايها بكل حرية واحترام للرأي الاخر بعض البنات لي كنت نتفق معهم
مليح في بزاف حاجات تبادلت معاهم الايميلات وبدينا نحكو كل وقت وتعرفنا على
بعض اكثر واكثر

واول بنت تعرفت عليها كان اسمها ايناس من الاردن حكيت معاها مرة او اثنين
ومن بعد خفت منها تكون راجل ومتنكر باسم بنت خاصة بعد ماقريت موضوع كاتباتو
وحدة صرا معاها مشكل بسبب بنت تعرفت عليها بالانترنت وخرجت راجل مش متخلق
ويتلاعب ببنات الناس بديت نشك في اي وحدة نحكي معاها و بعد ما ايناس قالتلي
بلي تبغي القهوة كحلة وليت نشك فيها على خاطر احنا عندنا في الجزاير لي
يبغو القهوة كحلة اكثرهم رجال قلت احسن حل باش نعرف ايلا هي بنت او ولد
نقلها بلي انا رجل ماشي بنت ونشوف ردة فعلها واول ماحكيت معاها قلتلها انو
انا ولد ومنتنكر باسم بنت ومن يومها مازدتش حكيت معاها!!!!!!!!! نظن
blokatni

ماكانتش ايناس البنت الوحيدة لي عرفتها تعرفت من بعدها على بنات اخرين
ولقيتهم بزاف ملاح كنت نبغي نتعرف على ناس من خارج الجزائر بصح المهم يكونو
بنات خاطر ماكنتش نبغي نحكي مع شباب واكثر بنات عرفتهم من خارج الجزائر
كانو من فلسطين الشقيقة حبيتهم بزاف لأنهم كانو sensible وحنان وعقيلتهم
ماشي كيما احنا هوما عاطفيين اكثر ومن اكثر البنات الفلسطينيات لي حبيتهم
من قلبي وفاء و رغد و صفاء و بسمة و فدوى وتعرفت تان على بنات من بلدي
الجزائر والصراحة كنت ناخذ راحتي ونرتاح اكثر كي نحكي معاهم خاطر مانكونش
مظطرة باش نترجم كلامي او نحس روحي غريبة وهنا عرفت الفرق بين لما تحكي مع
شخص من نفس بلدك وشخص من بلد ثاني عندو ثقافة وبيئة مختلفة احنا الجزائريين
نفكرو تقريبا بنفس الطريقة مثلنا مثل أي شعب في بلد اخر يكون عندهم طريقة
تفكير معينة تميزهم عن غيرهم ومايفهمها غير هوما وكانت أميرة أول بنت
جزائرية تعرفت عليها بالانترنت حبيتها بزاف وبعد ما كنت نحكي برك مع ناس
المشرق وليت لبلادي وحسيت بالراحة اكثر كي لقيت تقارب وتفاهم بيني وبين
اميرة وهي تان كانت ترتاحلي وتبغي تحكي معايا من وقت لي شافت ردودي في
المنتدى لي من خلالو تعرفنا على بعضانا

أميرة عرفتني على صحاباتها ووليت نحكي مع بزاف بنات بصح بقات اميرة هي
الاقرب لقلبي نحكيلها على كلشي في حياتي وحتى هي ماكانت تخبي عليا ولا شي
وهنا بدات تنشأ علاقة صداقة حقيقية بيني وبينها في الاول كنت نحس بلي بزاف
بنات يبغوها ويعتبروها اقرب وحدة ليهم وكنت نتمنى وسط كامل هذو لبنات نلقى
مكان في قلبها ومع الوقت بديت نحس اني لقيت مكان مميز عندها وبديت نستغنى
على صحاباتي تع الجامعة مدام لقيت البديل البنت لي تفهمني مليح وتساندني كي
نقلها ما نسمعش الغنا ومانشوفش المسلسلات ومانحكيش مع شباب في النت كانت
هي تان عندها نفس المبادئ والافكار وفي بلاصة مانقعد كامل الوقت نقنع فيها
هذا حلال وهذا حرام كنا نقعدو نحكو في مواضيع اخرى اكثر اهمية وقتها بديت
نحس بلي ربي عوضني بصديقات الانترنت عن صديقات الجامعة بصح مالازمش ننسى
انو هذو الصديقات رح يبقاو برك وراء الشاشة ولازم نبدا نحوس على بنت تكون
شريكتي في ال mémoire تاعي ونلقى انا وهي الpromoteur لي يأطرنا ويشرف
علينا في رسالة التخرج

ما احتاجش الامر الى تفكير كبير بسرعة اخترت فاطيمة لأنها كانت الأقرب ليا
واكثر بنت نتفاهم معاها كنت متأكدة بلي حتى هي مارحش تختار وحدة اخرى من
غيري وغير قلتلها قالتلي اذا راكي تسقسي فيا اكيد تكون هبلتي هذا امر
مايحتاجش سؤال اكيد انتي اعز صديقة ليا انا اخترتك وما كنتش حتى رح نسقسيك
اذا تقبلي او لا انا كنت رح نسقسيك واش تبغي ندو كموضوع للبحث وقتها فرحت
بزاف وكبرت في عيني وقلت اذا ماخرجت من الجامعة بحتى حاجة بزاف عليا اني
خرجت وانا عندي صديقة هايلة كيما فاطيمة

بدينا مع بعض رحلة البحث عن استاذ يقبل ي encadraina رحنا في الاول لأستاذة
قلت انا احسن تكون مرا باش يكون التواصل معاها افضل وفاطيمة وافقتني الراي
مع انو ماكنش عندها مانع لو كان استاذ وكي حكينا معاها قالتلنا انو
ماتقدرتش لانو عندها بزاف طلبة يعني الناس اختارت promoteur من نهاية العام
لي فات واحنا رانا في نهاية الفصل الاول كل الاساتذة كانو occupé وكل ما
نروحو لواحد نلقاو عندو مايكفيه حتى بدينا نكرهو وخاصة كي كامل القسم كانو
لقاو promoteur تاعهم ماعدا انا وفاطيمة بدات تحكمني الخلعة والخوف وبديت
نكره بصح الحمد لله كانت فاطيمة معايا وفكرت في استاذ يقولو عليه قبح بزاف
ولسانو ماشي ليه وعلى هذا ولا طالب تجرأ وراح ليه وحتى انا كي قالتلي في
الاول عليه رفضت خاطر كنت نخاف منو بزاف بصح فاطيمة قالتلي بلي يسلكها في
خدمتو وعندو في الراس والأهم انو ماعندناش حل اخر

وصلى اللهم وسلم على سيدنا محمد

♥♥ عدد المساهمات : 21453 تاريخ التسجيل : 08/11/2010

السلام عليكم

ترددت بزاف قبل مانروح مع فاطيمة لعند الاستاذ هذاك وبعدما استجمعت كل
شجاعتي رحنا وطبطبنا عليه في bureau تاعو بصح مالقيناهش قلت في قلبي الحمد
لله على الاقل ريحت مؤقتا mais فاطيمة اصرت باش تستناوه حتى يرجع بقينا
تقريبا ساعتين واحنا قدام باب المكتب وكي حسينا بلي اكيد مارحش يرجع رحنا
واتفقنا نرجعو ليه غدوة بكري باش نلقاوه وفي اليوم التالي وصلت انا قبل
فاطيمة لقيت باب المكتب تاعو مفتوح وسمعتو يزقي على وحدة من الطالبات لي
عندو ماتجرأتش ندخل ونحكي معاه قلت الاحسن نستنى فاطيمة حتى تجي ونقلها
اهدري انتي معاه

فاطيمة كي العادة دايما متاخرة عن الموعد بصح هذي المرة ماكانتش عندي فرصة
باش نلومها او نعاتبها غير وصلت قلتلها اغصبي ندخلو ونحكو معاه قبل مايخرج

تنفست بعمق ودخلت وراء فاطيمة لي كانت اشجع مني وبعدما قالت السلام بدات
مباشرة تحكي في الموضوع الشيخ خلا فاطيمة تهدر وبدا يطل عليا انا لي كنت
واقفة موراها وقالها وهذي لي جبتيها معاك شكون بنتك ؟؟؟

قلت في قلبي الله اكبر اكيد راه عليا حشمت بزاف وطليت من وراء فاطيمة
وقلتلو السلام عليكم وما أمنتش كي شفتو ضحك استغليت الفرصة وتقدمت شوية
ووقفت حذا فاطيمة قالنا هكة على الاقل نشوفكم مع بعض ماشي ورا بعض ومن بعد
جاوبنا على الموضوع الرئيسي لي على جالو رحنا ليه وكان جوابو ماشي مريح
ابدا قاللنا بلي هو عندو وظيفة ادارية وممكن تشغلو وقتو كامل على هذاك
مارهش يفكر يأطر طلبة في هذا العام بصح هذا ماشي قرار نهائي يعني لي فهمتو
انا بفهامتي البسطية ان راه باغينا نبقاو نتبعو فيه شوية حتى يقرر سيادتو
ويتكرم ويوافق يعطينا شرف تأطيرنا من قبله

ماعجبنيش الحال كامل من هذا الاستاذ وقلت لفاطيمة يالله نشوفو واحد اخر
وبالفعل حوسنا وسيينا زهرنا مع اساتذة اخرين بصح كل مرة نرجعو بخيبة امل يا
اما الاستاذ مشغول او المواضيع لي عندو ماهيش من اهتمامنا او من تخصصنا
المهم مالقيناش ولا استاذ يريحني من الغمة لي كنت رح نعيشها مع هذاك
الاستاذ القبيح لي قاللنا ارجعو ليا بعد ايام نعطيكم الرد النهائي

بعد ثلاث ايام رجعت فاطيمة وحدها للأستاذ وقالها نفس الكلام انو مزال
ماقررش واعطاها موعد بعد اسبوع كي حكاتلي على الرد تاعو قلتلها اكيد ما
راهش قابلنا وراه يجيب بينا في الوقت وانا بيني وبين نفسي كنت برك نحوس
نقنعها كيفاش تبطل منو حتى لو كلفني هذا اني ما نتخرجش هذا العام

مر الاسبوع ولحقنا لليوم الموعود رحت وانا نجر في رجليا ونتمنى يقولنا
مانقبلكمش اكثر مما نتمنى انو يقبلنا وكي لحقنا للبيرو تاعو مالقيناهش تم
قالك عندو اجتماع مهم في الادارة باش يسلموه الوظيفة واتفقت انا وفاطيمة
نرجعو ليه في الغد ان شاء الله

في الليل خممت بزاف و قلت لازم نتغلب على خوفي ونقبل بهذا الاستاذ هذا اذا
هو طبعا قبل بينا وجات في بالي نصلي صلاة استخارة لأني حسيت بلي برك ربي
سبحانه لي قادر يسلكني من هذي الورطة ويقدرلي لي فيه الخير وفي الصباح رحت
وانا لأول مرة مرتاحة وغير وصلت استنيت فاطيمة شوية وكي جات دخلنا للاستاذ
لقيناه شوية مشغول وقاللنا اصبرو عليا نص ساعة ونفرغلكم حسيت بلي خلاص هذي
اخر فرصة وغير خرجنا من عندو قلت لفاطيمة خلاص مانزيدوش نرجعو ليه راكي
شفتي بعينك كيفاش يتعامل معانا هذا من اولها راه مشيبنا كيفاش من بعد قلت
هذي الهدرة وانا نغلي من الداخل وحتى فاطيمة حسيتها زعفت وباغية تبطل منو
فكرنا بزاف في حل يسلكنا وقلنا نروحو لل chef de département ونحكو معاه
ونطلبو من يقترح علينا استاذ او يلقانا حل وكي حكينا معاه تفاجأنا انو
اقترح علينا الاستاذ هذاك نفسو لي كنا عندو وبدون تعليق خرجنا من مكتب ال
chef de département مباشرة لمكتب الاستاذ وعلى غير العادة هذي المرة انا
لي قلت السلام وبديت نحكي مع الاستاذ قلتلو من فضلك يعني لازم تقلنا على
قرارك النهائي اذا تقبلنا لينا الشرف واذا لالا نروحو نشوفو من جيهة اخرى
خيرمن يفوت الوقت ومانلقاو حتى استاذ يأطرنا والشي لي لاحظتو انو من وقت لي
بديت نحكي والاستاذ يتبسم مافهمتش وعلاه وكي كملت هدرتي قالي والزعاف علاه
يا لالة راني قبلتكم ورح ناطركم ان شاء الله بصح لازم تزيرو رواحكم وتكونو
شاطرات راكم تعرفوني بلي sérieu بزاف في الخدمة ومانبغيش تمسخير

اكيد هذو الكلمات الاخيرة انا ماكنتش نسمع فيها وكنت برك فرحانة بلي اخيرا
لقينا promoteur لي يشدنا ونسيت كامل الخوف تاعي وقعدت نحمد في ربي ونشكر
فيه

وصلى اللهم وسلم على سيدنا محمد

♥♥ عدد المساهمات : 21453 تاريخ التسجيل : 08/11/2010

يتبع..

[ندعوك للتسجيل في المنتدى أو التعريف بنفسك لمعاينة هذه الصورة]

يعطيك الصحة
فكرتيني بالونكادرور تاعي كيفاه شيبني و نشفلي ريقي

يعطيك الصحة سارة
تفركت كيفاه مرمدتني لونكاندرور نتاعي
اوه ايام و فاتو ههههههه
نستناو الباقي

مشكورة سارة

قصة رائعة
مازلت ما كملتهاش و عجبتني :155:

شكرا

هايلة بصح كملي انا تانيك قريت في الجامعة بصح مكانش ايام عجبوني كي تاع الليسي ايام اهبال <img src=

" longdesc="52" />

» فتاة جزائرية في أمريكا
» يوميات هو وهي في رمضان
» قصة مضحكة جدا جدا جدا