يوميات فتاة جامعية جزائرية، مضحكة ،جميلة- حتى الادمان نهاية القصة

♥♥ عدد المساهمات : 21453 تاريخ التسجيل : 08/11/2010

السلام عليكم
مر أكثر من شهرين تع قراية وتعب وبحوث مستمرة تقريبا كان عندنا كل اسبوع
بحث وهذا ماكانش كامل عاجبنا حسينا رواحنا نتعبو اكثر من les prof[ندعوك للتسجيل في المنتدى أو التعريف بنفسك لمعاينة هذه الصورة]
لي راهم يخلصو على جهدنا احنا ولأننا كنا قسم فيه جميع أنواع المتمردين
قررنا باش نديرو اضراب قدام الإدارة ونقولو بلي رانا نتعبو بزاف واحنا رانا
نقومو بدور الأساتذة والطلبة في نفس الوقت ولازم يلقولنا حل ودخلنا
بالإضافة لهذا المطلب مطالب اخرى باش نبانو بلي رانا على حق مثل انو رانا
حابين نشوفو اشياء عملية وبأننا كرهنا من تكرير
Les TP
تع السنوات لي فاتو و مازلنا مادرنا حتى جديد ولا حاجة متعلقة بالتخصص تاعنا بشكل خاص
درنا الإعتصام و شاركونا فيه بزاف طلبة ماشي إقتناعا بقضيتنا بصح كامل الناس تبغي الهيلولة [ندعوك للتسجيل في المنتدى أو التعريف بنفسك لمعاينة هذه الصورة]وانا كنت وحدة منهم.

الإدارة إقتنعو بمطالبنا وقالولنا يجي ال déléguai تاعكم ويحكي معانا واحنا نوعدوكم بحلول ترضيكم
وبما أنو كان عندنا مسؤول واعر يعرف مليح كيفاش يجيب حقو لي كان هو حقنا
كامل يسمى نتكلو عليه تع الصح خيرناه وقبلنا انو هو لي يتفاوض معاهم وطلبنا
من الممثل تاعنا يكون عند المسؤولية ويريحنا من البحوث القاوية لي راهي
تستنى فينا [ندعوك للتسجيل في المنتدى أو التعريف بنفسك لمعاينة هذه الصورة]
وبعد ما انتهى الإجتماع [ندعوك للتسجيل في المنتدى أو التعريف بنفسك لمعاينة هذه الصورة] لي كان يضم أعضاء من الإدارة وبعض أساتذتنا والممثل الجميل[ندعوك للتسجيل في المنتدى أو التعريف بنفسك لمعاينة هذه الصورة] تاعنا لي جا وقاللنا على قرارات مجلس الإدارة
وكانت كالتالي البحوث رح تكون نصف شهرية يعني كل فوج يكون عندو بحثين فقط
في الشهر والاساتذة مايعتمدوش غير على بحوثنا احنا اما بخصوص les TP ماكانش
عندنا بزاف امكانيات في المخابر تاعنا وهذي طبعا ماخممتش فيها إدارتنا
الموقرة قبل ما تدخل
La biotechnologie
في قائمة التخصصات الموجودة عندنا وباش يغطو على هذي الثغرات قرروا باش
ينظمولنا عدة خرجات ميدانية نشوفو فيها مخابر واماكن تتعلق بال
Programme
لي كان مقرر لينا
وكانت أول خرجة ميدانية لجامعة السانية بوهران وذلك لمدة أربعة أيام (برك)[ندعوك للتسجيل في المنتدى أو التعريف بنفسك لمعاينة هذه الصورة] مع ضمان مكان الإقامة للبنات والذكور[ندعوك للتسجيل في المنتدى أو التعريف بنفسك لمعاينة هذه الصورة]
وصلى اللهم وسلم على سيدنا محمد

♥♥ عدد المساهمات : 21453 تاريخ التسجيل : 08/11/2010

السلام عليكم
خبر الخرجة تع وهران فرحنا كامل وبدينا نخططو لكيفاش رح نفوتو هذو الأربعة أيام[ندعوك للتسجيل في المنتدى أو التعريف بنفسك لمعاينة هذه الصورة] بصح الحاجة لي كانت مخوفتني هي أهلي يعني بابا وماما وخويا كيفاش رح نقنعهم كنت خايفة بزاف ايلا مايقبلوش
وكي رجعت للدار بديت نوجد في مقدمة شابة باش ندخل بيها للموضوع استنيت حتى
اجتمعنا كامل على الطابلة تع العشا ولي كان غايب هو خويا برك وهذا كان في
صالحي[ندعوك للتسجيل في المنتدى أو التعريف بنفسك لمعاينة هذه الصورة]
طبعا قلت نقنع بابا وماما بعيدا عن الظغوطات لي يديرها خويا عليهم وبعدما
يقتنعو هوما يقنعوه معايا وغير بدا بابا في الحاجة لي يبغيها وهي الفاكية
لقيت بلي هذا هو الوقت الوحيد لي أبي مسكين يكون فيه في أسعد حالاتو [ندعوك للتسجيل في المنتدى أو التعريف بنفسك لمعاينة هذه الصورة]
وقلت نستغل هذي الفرصة ونقلو على الإضراب لي درناه وبديت نحكيلهم وبابا
أكيد عجبو الحال بزاف كيفاش ضربنا على حقنا وطالبنا بيه بلا خوف وبطريقة
سلمية
وتماك لقيتها فرصة باش نقلو كيفاش كان رد الإدارة بعدما استعرفو بينا
وقلتلو في وسط هذي الهدرة كامل بلي اعطاولنا خرجة علمية لوهران باش نزيدو
نقراو ونشوفو صوالح ماقريناهمش بابا هضم كامل الفاكية ومعاها الهدرة لي
قلتها الحاجة الوحيدة لي كانت عسيرة الهضم هي الخرجة تع وهران خاصة كي عرف
بلي لمدة اربعة ايام (كاملة)
وكي دخل خويا ماكانش بحاجة للي يزيد يحكي معاه مدام شاف بلي بابا ماكانش قابل ضربها بسكتة وخلاص
انا تحطمت وكرهت حياتي ونضت لبلاصتي وبلعت على روحي في شمبرتي وقعدت نحكي
لأختي كيفاش كامل لبنات رح يروحو ويزهاو ويتعلمو وانا نقعد في الدار [ندعوك للتسجيل في المنتدى أو التعريف بنفسك لمعاينة هذه الصورة] اختي مسكينة ماكان بيدها والو بصح قعدت تسمعلي شوية قبل مانلقاها كي العادة[ندعوك للتسجيل في المنتدى أو التعريف بنفسك لمعاينة هذه الصورة] رقدت!!!!

في الصباح كي رحت للجامعة لقيت بلي ماكنتش وحدي لي رفضو أهلها حكاية وهران
هذي وقلنا نديرو حل في الإدارة اعتبرو الخرجة هذي إلزامية وحطوها
TP
يعني الحضور ضروري وفيه نقطة تدخل في إمتحان اخر السنة بعدما كل واحد يقدم تقرير عن كل لي شافو وتعلمو
في هذا ال
TP
قررنا بعدما سمعنا بهذي الهدرة نروحو ونحكو مع الأستاذ المسؤول على الرحلة
وكي قلنالو صنعلنا إستدعاءات ومد لكل وحدة فينا واحد تعطيه لباباها باش يجو
ويهدر معاهم ويقنعهم بلي هذي داخلة في قرايتنا ولازم انا اديت الإستدعاء
وانا فرحانة خاطر كنت عارفة ومتأكدة بلي بابا غير نوريهلو يقلي روحي وين
تبغي برك ماتدينيش معاك
مسكين عمرو ما راح لحتى إستدعاء
رجعت للدار و على وجهي إبتسامة خبيثة[ندعوك للتسجيل في المنتدى أو التعريف بنفسك لمعاينة هذه الصورة]
بعد ماخرجت الصباح وانا زعفانة وغير جا بابا وريح شوية من الخدمة وريتلو
هذاك الإستدعاء زعما كنت عارفة بلي رح يرفض باش يروح معايا للجامعة بصح
بابا قالي معليش غدوة نطلب ساعة من المدير ونجي للإجتماع هذا!!!

بديت نقول في قلبي من وقتاش دخلت ثقافة الإجتماع لعقل بابا [ندعوك للتسجيل في المنتدى أو التعريف بنفسك لمعاينة هذه الصورة] ولا الإجتماعات تع الليسي ماكانش يبغي يروحلها وتع الجامعة معليش
اواه هذي الحكاية مارحش تفرا على خير Crying or Very sad

يتبع...

وصلى اللهم وسلم على سيدنا محمد

يعطيك الصحة سارة

مشكورة سارة

كملي الحكاية سارة تعيشي

♥♥ عدد المساهمات : 21453 تاريخ التسجيل : 08/11/2010

بلامزية البنات والله هبة جيت هنا باش نحط اوك دوك نحط لاتقلقو

[ندعوك للتسجيل في المنتدى أو التعريف بنفسك لمعاينة هذه الصورة]

♥♥ عدد المساهمات : 21453 تاريخ التسجيل : 08/11/2010

السلام عليكم
على الساعة 11 كان بابا في الجامعة وشفتو كي دخل لمكتب الأستاذ لي طلب
يقابلو باش زعما يقنعو قعدت في بلاصة مقابلة المكتب واستنيت كي يخرج باش
نشوف وجهو من البعيد اذا يبشر بالقبول او
وبعد شوية شفت بزاف أباء صحاباتي لحقوه وقعدنا استنينا احنا لبنات مع بعض
وبعد ساعة او اكثر خرجوا كامل بما فيهم الأستاذ لي كان خارج ويضحك معاهم
تقول يعرفهم من زمان تماك قلت لصحاباتي الظاهر والدينا هوما لي قنعو
الأستاذ يبطل هذي الخرجة وينحيها من بالو
على هذي لي قلت حتى نروح للدار ونشوف قرار تع بابا يعني فضلت نبكي وحدي في شمبرتي خيرمن نقعد نبكي هنا في الجامعة
وكي رجعت للدار دخلت وعلامة الإحباط في وجهي بصح مازال عندي شوية تع أمل نعرف أبي مسكين قلبو حنين...

صح ابي قلبو حنين بصح بقا يعذب فيا حتى لليل باش قالي انو أخيرا وافق بعدما
قدر الأستاذ يقنعو وفي الحقيقة هو وافق برك كي لقى روحو يعرفو من بكري
يسمى حشم منو هذا مكان [ندعوك للتسجيل في المنتدى أو التعريف بنفسك لمعاينة هذه الصورة]
هذي الموافقة جات بعدما بقى يوم واحد للخرجة تع وهران وكان لازم عليا نخمل
كابتي ونحط كامل صوالح لي نستحقهم وانا ماصدقت رحت تم تم في هذاك الليل
وجدتها وبقيت نستنى وقتاش يلحق يوم الرحلة

كان هذا اليوم هو الأحد رحنا في وقت مبكر للجامعة على اساس نروحو بكري
واجتمعنا كامل القسم تاعنا في بلاصة وحدة نستناو في les bus لي يدونا وبعد
ما استنينا قيمة ساعة كاملة بدى كل واحد فينا يمل ويروح يدور شوية جاء
المسؤول وقاللنا لازم نستناو l'autirisation لي يمضيها رئيس البلدية ورئيس
البلدية كان من زهرنا خارج البلدية طول اليوم [ندعوك للتسجيل في المنتدى أو التعريف بنفسك لمعاينة هذه الصورة]
يعني بعدما قدرت وبصعوبة ندي موافقة بابا باش نروح للرحلة بدات عراقيل اخرى
تبانلي ساعتها قلت في قلبي زعما لوكان انا مانيش ضمن افراد الرحلة يصراو
هذوة العراقيل؟؟؟؟؟
الأستاذ لي كان مسؤول على رحلتنا كان ولا على بالو رمى كامل المسؤولية على
هذاك déléguai تاعنا خاطر شافو كيفاش قدر بإتصالاتو يجيب رقم رئيس البلدية
وعيطلو وتفاهم معاه انو يتلاقى بيه بعد الظهر في المكتب تاعو
اما احنا قعدنا طول هذيك الفترة نتسكعو في ارجاء الجامعة وبالطبع كان
عاجبني الحال كي كنا كلما نفوتو على جماعة يقولو هذو هوما لي راهم رايحين
لوهران [ندعوك للتسجيل في المنتدى أو التعريف بنفسك لمعاينة هذه الصورة]
وفي وسط هذا الإستمتاع والسرور لي كنت فيه قطعني صوت التلفون كان بابا
يعيطلي باش يسقسيني وين رانا زعما على اساس قلعنا ورانا في الطريق [ندعوك للتسجيل في المنتدى أو التعريف بنفسك لمعاينة هذه الصورة]
بصح انخلع كي قلتلو بلي مزالنا في الجامعة وكي حكيتلو وعلاه مازالنا
مانروحو حسيتو شوية تقلق خاصة كي عرف بلي حتى بعد الظهر باش ننطلقو
وجاء الظهر وبعد الظهر قعدنا نستاو والمسؤول مزال ماجاش وكي لحقت الربعة تع
العشية تقلقنا كامل وبدينا نعياو أما انا فقدت الأمل إطلاقا بلي رح نروحو
هذي الرحلة خاصة بعدما أبي الحنون كان يعيطلي كل نص ساعة ويقلي وين راكم
واخر مرة قالي راني في الطريق جاي نديك نظن راهم الغاو الرحلة وحشمو باش
يقولولكم
( زعما ولى محلل نفسي) [ندعوك للتسجيل في المنتدى أو التعريف بنفسك لمعاينة هذه الصورة]
على 4.30 جاء المسؤول ومعاه التسريح وانا كنت اكثر وحدة مقلقة وقتاش يقلع
الbus هكة باش بابا مايلقانيش هنا كي يلحق وماجينا نوجدو رواحنا ونحكمو
بلايصنا كانت الساعة 5 مساءا وانطلقت الحافلة على أقل من مهلها [ندعوك للتسجيل في المنتدى أو التعريف بنفسك لمعاينة هذه الصورة] واحنا خارجين من الجامعة لقيت بابا قدام الباب الكبير ويجبد في تلفونو باش يقلي ارواحي راني قدام الباب
الحمد لله سلكتلها ورفدت عليه وقلتلو خلاص انطلقنا ورانا قريب (يعني) نخرجو
من الشلف وماسمعتش بعدها غير صوت طيييين طيييييين (قفل التلفون)
وصلى اللهم وسلم على سيدنا محمد

♥♥ عدد المساهمات : 21453 تاريخ التسجيل : 08/11/2010

السلام عليكم

بعد ما قطع بابا الإتصال تكيت على الكرسي تع الbuss وتنفست الصعداء لأني تاكدي اني خلاص رحت للرحلة

وزيد علابالي بابا ماراحش يطول في الزعاف مدام اعطالي الموافقة في الاول
يعني ماراحش يرجع في رأيو واكيد بعد ساعة او اثنين يعيطلي ويقلي وين راكم؟؟

قعدنا انا وفاطيمة حذا بعض وفتيحة وصحبتها الجديدة رزيقة قعدو مقابلينا
وكنا شاريين كوفريط وشيكولا وقاطو وقعدنا ناكلو ومقصرين طوااااااال الرحلة
فاطيمة فتحتلي قلبها وبدات تحكيلي على اسرارها الخاصة احنا صح كنا صحابات
بصح عمرنا ماحكينا في الأمور الخاصة اما اليوم قعدت كامل الطريق وانا نسمع
ومدهوشة من حكاياتها قالتلي بلي راهي تعيش قصة حب مع واحد تعرفت عليه
بالتلفون

بعد ماقطعنا مسافة كبيرة كنا كلينا كامل واش جبنا معانا في الطريق وأنا عن
نفسي صرالي تشبع وقريب طلعلي السكر من الحاجات الحلوة لي كليتها وقعدت
نقلهم ياجماعة لي عندو حاجة مالحة يعطيلي ومالقيتش غير شوية كاوكاو مالح
بصح كان يفي بالغرض

في الطريق حليت التاقة باش نشم الهوا والجو كان يهبل بارد ومنعش وعند
الدخلة تع مدينة وهران شفنا هذوك زوج سبوعة وهذيك البلاكة مكتوب فيها مدينة
وهران ترحب بكم صفقنا كامل وغنينا هذيك الغنية تع وهرن وهرن..............
وبقات الحافلة تمشي بينا واحنا في جو رائع وماخسرش فرحتنا غير كي شفنا
لائحة أخرى تقول مدينة وهران تشكركم على زيارتكم وتماك فقنا بلي كنا
متودرين خاطر الشوفار ماكانش حافظ الطريق في الظلمة حافظها غير في الضوء
ووقتها تقلقنا وخفنا بزاااااااف كانت الساعة العاشرة كي سمعنا المسؤول
تاعنا يعيط لصاحبو يسكن في الحي الجامعي وقالو ورينا الطريق والحمد لله
قدرنا نلحقو في الاخير لمكان الاقامة بصح الخبر لي ماكانش مليح هو انو
الإقامة كانت للذكور يعني رح ينزلو هوما ونبقاو احنا ماشي عارفين وين نروحو
وفي هذا الوقت لي كامل ماشي مناسب عيط السيد بابا خممت بزاف قبل مانرد
عليه وقررت باش نقلو وصلنا ورانا لاباس هكة باش مايرفدتش روحو ويجي يديني
في هذا الليل للدار ويحلف تكون هذي اخر خرجة في حياتي

لي يقراو معانا كانو ناس ملاح بزاااااف بقاو معانا وداو صاحبهم هذاك لي
ورانا الطريق وهو لي وصلنا للحي الجامعي لاقامة البنات وبعد ما تاكدو من
اننا كامل دخلنا حبسني المسوؤل وقالي معليش تعطيلي رقم تلفون تاعك

انا في الاول نخلعت خاصة بعد ماكنت غير كيما سمعت حكاية فاطيمة وصديقها لي تعرفو بالتلفون وقلتلو وعلاه؟؟؟

قالي برك باش نطمن عليكم ويلا استقبلوكم مليح او لا وباش نتفاهم معاكم
كيفاش نتلاقاو غدوة ووين نتلاقاو خاطر علابالي مارحش تعرفو الطريق للجامعة
ساعتها اعطيتو الرقم
ولحقت باقي البنات وفي الداخل استقبلتنا المديرة وبعض الفتيات لي منظمين ل l'ugel ودخلونا لقاعة كبيرة

انا وفاطيمة وفتيحة ورزيقة قعدنا في طابلة في اخر القاعة وبدينا نشوفو من
ورانا لقينا طاقة تطل على قاعة كبيرة وفيها تلفزيون وكان تماك بنات بزاف
يشوفو في وحد المسرحية وكي شافونا وحد لبنات جاو وهدرو معانا وسقساونا من
وين جينا ووعلاه جينا و بعد ماعرفونا شكون احنا قالولنا بلي هوما من
غيليزان عجبونا بزاف خاطر يبانو فحشوشات ويضحكو بزاااف وقالولنا ايلا تحبو
نستقبلوكم عندنا بكل صدر رحب واحنا سقسيناهم اذا كاين عندهم بلاصة لينا في
أربعة قالوللنا كاين بلاصة لثلاثة فقط بصح معليش ندبروا بلاصة الرابعة ماشي
مشكل فرحنا بزاف كي ظمنا انو رح نبقاو مع بعض في نفس الغرفة و كي بدات كل
مجموعة تروح مع احد الطالبات المنظمات للجمعية باش يتقاسمو معاهم الغرفة
وهذا بطلب من فرع هذيك المنظمة لي موجود تان في جامعتنا قعدنا احنا في
الأخير وبعد ما خلاصو كامل قلنالهم احنا خلاص لقينا مع من نتقاسمو الغرفة
وماكانش عندهم مانع اكيد لأنو أصلا كانت خلاصت الغرف لي ممكن يتقاسموها
معانا

رحنا مع البنات واحنا ساكتين خاطر كنا خايفين شوية لأننا رح نبات مع بنات
مانعرفوهمش كامل واحنا لي خيرناهم يسمى أي شي يصرا احنا نتحملو مسؤوليتو
وكي لحقنا لل بلوك تعهم قالوللنا بلي هوما عندهم غرفتين غرفة مخلينها فارغة
للضيوف او ليهم هوما أيام الإمتحانات ينفردو فيها للمراجعة والثانية
يتجمعو فيها هوما كامل لانها كانت كبيرة وواسعة

فرحنا بزااااااااف كي عطاولنا غرفة لينا وحدنا ودخلنا ليها وبعد ما بدلنا
كسوتنا وتوضينا وصلينا كامل الأوقات ظهر وعصر ومغرب وعشاء يعني رجلينا
تكسرو من كثر الركوع والسجود عيطلي المسؤول لي يقرا معانا وقالي ايلا كلش
راه لاباس وانا قلتلو الحمد لله رانا كامل في les chambres تاعنا

في الغرفة لي عطاوهالنا لقينا زوج مطارح برك حولناهم وقربناهم من بعض باش
نقدرو نرقدو احنا الاربعة فوقهم واكيد رقدنا على العرض باش يقدونا كانت
رقدة الله لا يشوفكم المخايد كانو كاينين زوج برك يسمى انا وفاطيمة في وحدة
وفتيحة ورزيقة في وحدة ولالة فاطيمة داتلي المخدة بعدما رقدت وبقى راسي
مدلي بين المطرح والحيط
يتبع..

وصلى اللهم وسلم على سيدنا محمد

هايلة
يعطيك الصحة

♥♥ عدد المساهمات : 21453 تاريخ التسجيل : 08/11/2010

بلا مزية

♥♥ عدد المساهمات : 21453 تاريخ التسجيل : 08/11/2010

السلام عليكم
الصباح لقينا رواحنا راقدين كي السردين وكي نضنا كنا كامل مكسرين وأنا صبحت
رقبتي عوجة وراسي يسطر ماقدرناش نكملو رقادنا نضنا توضينا وصلينا وبدينا
نلبسو حتى صونا تلفون كان رقم جديد حسيت بلي تع هذاك المسؤول لي يقرا معانا
وكي رفدت لقيتو صح هو قالي قولي للبنات يوجدو رواحهم على 8.00 وتلقاونا
قدام باب الإقامة باش نروحو للمخبر لي رح نديرو فيه ال TP
تفاهمنا انا وفاطيمة وفتيحة ورزيقة باش كل وحدة فينا تعيط لزوج بنات
وتوصيهم يقولو للي حذاهم باش نتلاقاو كامل في ساحة الإقامة ونخرجو مع بعض
وهبطنا استنيناهم وبعد مدة بداو يجو بالوحدة وانا زعفت عليهم كي بطينا
وخلينا الاولاد برا يستناو وفي الحق زعفت كي عرفت بلي كامل كانو يشربوا في
قهوتهم غير احنا لي خرجنا بلا قهوة
على 8.10 كنا قدام الباب ولقينا الولاد لي يقراو معنا يستناو فينا رحنا
كلنا مع بعض للجامعة وفي الطريق سقساني المسؤول تاعنا ايلا تهلاو فينا
البنات قلتلو ايه عجبنا الحال وسقساني تان ويلا تعشينا قلتلو بلي والله
ماطاحتلنا وتماك ردت وحدة صحبتي
وقالتلو: لالا احنا تعشينا وعشا هايل تان
قالي: شكون هوما لبنات لي داوكم معاهم؟؟
وكي قلتلو بلي كانو بنات وخلاص وماشي من
l'ugel
قاللنا اذا هكة الله غالب الجامعة وصات لبنات تع l'ugel هوما يستكلفو بيكم
وعطاتهم العشا بالزيادة باش يعشوكم وقت ماتوصلو انتوما وعلاه رحتو مع بنات
اخرين!!!

ماقدرناش نقولولو احنا خيرناهم قلنالو بقينا احنا برك مالقيناش مع من نروحو
رحنا مع بنات اخرين بصح في قلبي بقات تحرق تع لي كامل تعشاو عشا الله الله
واحنا لي طفرت فينا
عند الدخلة تاع الجامعة ماخلاناش l'agent ندخلو راح المسؤول تكلم معاه زوج
كلمات وبلخف بدا يقولو مرحبا مرحبا بيكم تفضلو وقت ماتبغو الدار داركم
دخلنا وقعدنا قدام المخبر نستناو في الاستاذ لي جا معانا باش يقرينا وبعد
شوية لحق الأستاذ ومعاه امراة اخرى قالنا بلي هي بروفيسورة كبيرة تقري في
جامعة وهران ودخلنا للمخبر وبدات تشرحلنا في بزاااااف حوايج وانا لعبتها
نكتب في واش كانت تقول زعما باش تقول علينا فاهمين وغير شافتني نكتب بقات
كامل الدرس تشرح وتخزر فيا حتى حسبوها تقربلي ولا تعرفني
كملنا النظري وبقا دور العملي بدينا الTP الأول على الساعة 10 وعلى ال 12
كنا مكملين وخارجين وقبل ماكل واحد يروح في جيهة قاللنا المسؤول ايا نروحو
نفطرو في المطعم الجامعي وتماك تفكرت حكايتي مع الريسطو ايام سنة اولى
ياحسراه قلتلو ماكالاه نخاف مايخلوناش ندخلو بصح هو طمني وقالي ماتخافوش
على ضمانتي
المسؤول سبقنا للمطعم ودخل وتكلم مع لي يخدمو تم وبعد شوية خرج وقاللنا
لازم نصبروا شوية حتى يكملو مع الطلبة تاعهم ومن بعد يتلاهو بينا احنا قلنا
معليش مدام ماعندنا واش نديرو نستناو وخلاص

درنا جماعة كبيرة مخلطة بين بنات وولاد وقعدنا نهدروا في مواضيع بزاااف
وكامل لبنات كانو مريحين ويضحكو غير اانا وفاطيمة وفيتيحة ورزيقة لي كنا
ساكتين ومذبالين أكيد خاطر ماكليناش من البارح ومازلنا نزيدو نستناو كامل
لي يقراو معانا فاقولنا ودوروها زعاقة علينا وماسلكناش منهم غير الطباخ كي
عيطلنا وقاللنا ارواحو تفطروا
دخلنا للمطعم بلا لاشان بلا والو لقيناه فارغ وبداو الطباخين يجيبولنا في الفطور زعما تهلاو فينا
حطولنا لابيري بالجاج والجلبانة ب les boules والسلاطة تع بيطراف وزرودية
وle fromage والتفاح والتمر وتماك فهمنا وعلاه قالولنا استناو حتى يخرجو
كامل خاطر الفطور كان خاص لينا احنا يعني ماشي لكامل الطلبة
المهم انا وجماعتي زدمنا على الماكلة بلا مانشوفو لحتى واحد خاطر كنا
ميتين بالجوع وكي فطنا لقنيا بلي كامل لي يقراو معانا خرجوا وبقينا احنا
الأربعة وشوية بنات جا لينا الطباخ وقاللنا مزال كاين الفطور ايلا تبغو
نعطوكم تدو معاكم للعشا واحنا خزرنا يمين ويسار وكي مالقينا حتى واحد
قلنالو هات ماذا بينا
راح جابلنا sachet كبيرة فيها الفرماج والخبز وحاجات اخرى ماعرفناهمش تم تم
بصح ديناها وبدينا نحوسو وين نخزنوها باش مايشوفوناش الاخرين ومالقاوش خير
من ساكي كبير ويرفد حطو فيه الاكل ولحقنا البقية كلي مادرنا وااااااالو
ورحنا باش نخرجو بصح الشيخ حبسنا وقاللنا بلي رح يدينا لوحد المخبر كبير في
وهران يدير تحاليل وبحوث وفيه بزاف حوايج جدد علينا لازم نستغلو الفرصة كي
رانا هنا ونروحو نشوفوه وأكيد ماكانتش عندي فرصة باش نروح نحط الساك ونجيب
اخر ولا نفرغو ونرجع اظطريت نروح بيه هاكاك معمر وثقيل ومشينا طريق
طوييييييلة وانا رافداتو على كتفي ومزية لي فاطيمة حست بيا في نص الطريق
وقالتلي ايا نتبادلو
كي رجعنا العشية للحي الجامعي كنا كامل خالصين وعيانين وقبل مانوصلو للشمبر
تاعنا فتنا على فوايي قلنا ندخلو نشربو قهوة خاطر ماشربناش الصباح دخلنا
وطلبنا قهوة وقاطو قعدنا ريسانا مليح مليح وشبعنا ضحك على الساك المعمر
بالماكلة لي حوسنا بيه وهران كاملة
وصلى اللهم وسلم على سيدنا محمد

♥♥ عدد المساهمات : 21453 تاريخ التسجيل : 08/11/2010

السلام عليكم
رجعنا لل chambre تاعنا وقعدنا ريحنا شوية وبعدها بدينا نوجدوا في رواحنا
باش نتعشاو حتى طبطبت علينا حليمة وحدة من لبنات لي استقبلونا عندهم كانت
بنت بزاااف مليحة هي وكامل صحاباتها سمية وشريفة ونسيمة
فتحت انا الباب وقالتلي راهم عارضينا نتعشاو عندهم الليلة فرحت بزااااااااف
بصح لعبتها نقلها وعلاه وعلاه بزاف عليكم استقبلتونا وتزيدو تعشونا بصح
هي أصرت وقالتلي العشا راه قريب يوجد ولازم تجو وراحت.

رحنا خبينا العشا لي كنا رح نتعشاو بيه ووجدنا رواحنا ورحنا عندهم
la chambre تاعهم كانت بزاف كبيرة كاين وين يرقدو وكاين طابلة كبيرة وين
يتعشاو ويقراو وكاين حتى بلاصة وين يطيبو لقيناهم موجدين الطابلة وكانت
الله يبارك حاجة تشهي الجاج بالزيتون والحريرة باللحم والسلاطة وحتى
الفاكية مانساوهاش والله خرجو ناس ملاح ونساوني في عشا البارح لي ماتعشيتوش
وبعدما تعشينا قعدنا مجمعين عندهم وحكاولنا على حياتهم في la cité انا عجبتني بزاااف طريقة لي عايشين بيها يعتمدوا بزاف
على رواحهم وكاين دايما ambiance
وقصرة حلوة بين لبنات
وفي أخر السهرة حطولنا لاتاي مع الكاوكاو وكي رجعنا لشمبرتنا كنا طافيين
وماطلبش علينا غير الرقاد بصح انا تفكرت واش صرالي البارح قلت والله نطلب
مخدة من عند لبنات راهم كرما بزاف اليوم ولازم نستغل هذا الكرم وكان الأمر
كذلك اعطاولي مخدة تع وحدة صحبتهم راحت لدارهم عنقت مخدتي وفرحت بيها
وقلتلهم تاعي وحدي واحد ما يشاركني فيها

الصباح نضنا بكري ولبسنا وجينا خارجين وعند الباب لاقتلنا شريفة قالتلنا
اليوم والله ماتروحو بلا قهوة كيما البارح لازم تشربوها وراهي واجدة عندنا
والله حشمونا هذو لبنات بالكرم تاعهم وانا لي زعما فكرت نندم اني مارحتش مع تع l'ugel
(إتحاد الطلابي الحر)

رحنا للدرس الثاني في جامعة وهران وكان درس اليوم بزاااف معقد وصعيب وقليل
لي فهمو انا كي عادتي حكمت الورقة والستيلو ودخلتها كتبة بصح الفهامة يجيب
ربي
بعد النظري جاء دور العملي كي العادة
ال TP تع اليوم كان طويل بزاف ويلزملو الوقت درنا التجربة وكان لازم نستناوها سبع ساعات كاملة من 11 للساعة 6
ماعرفناش كيفاش نفوتو هذوك الساعات بعض لبنات ومنهم فاطيمة راحو للمدينة
الجديدة كاش مايشروا بصح انا كي سقسيت بابا قالي attention تروحي
وماوضحليش الأسباب
وانا طبعا ماتجرأتش نسقسيه وعلاه مدام رفض بهذيك الطريقة
قعدت انا وفتيحة ورزيقة ومعانا شوية من لولاد لي يقراو معنا سقسيتهم وين
راحو صحابهم قالولي راحو لحديقة الحيوانات غرت منهم بزاااااااف وقلتلهم
وعلاه ماقالولناش كون رحنا معاهم
بعد شوية جات وحدة لافامي تع رزيقة لي تقرا في وهران وعاونتنا هذيك المرة
في ال exposée لقاتي زعفانة ومقنوطة خاطر بقينا احنا برك لي مارحنا لحتى
بلاصة وقعدنا وحدنا قالتلنا ايا نديكم لحديقة التسلية كاين بزاف العاب تم
ورح تفوتو وقت هايل قلت نعيط لبابا ونقلو وأبي مسكين غضتو وزاد كي عرف بلي
رح تروح معانا وحدة تعرف وهران مليح قالي روحي معليش
فرحت بزاف ورحنا كامل مع لولاد لي يقراو معنا باش زعما يعسونا كاش مايتكلمولنا
Les jeunes

رحنا للحديقة ودخلنا بعدما شرينا تيكيات تع الدخلة وبداو يقولولي انتي
صغيرة تقدري تشري تيكي بتسعيرة الأولاد الصغار وانا طبعا ما سكتلهمش قلتلهم
حتى انتم راهم دايرينلكم تسعيرة خاصة للمعوقين
فوتنا ست ساعات من أجمل مايكون ركبنا في بزاف ألعاب واكثر لعبة بكيت وضحكت
فيها هي تع البابور في الأول بديت نضحك خاطر كان يطلع غير شوية وبعدما بدا
يطلع بزااااااااف وليت نزقي ونقلهم ادوني لدارنا
وكي نزلت كانت هذيك أخر لعبة طلعت فيها خاطر قلبي دار عليا وعطيتلهم الفطور
لي جبناه البارح من الريسطو هوما كلاوه وانا قعدت نشوف خاطر كنت مريضة من
هذيك اللعبة
رجعنا العشية وكانت الستة دخلنا للجامعة وكملنا التجربة تاعنا وبعدها رجعنا للحي الجامعي اللي وصلونا ليه الاولاد ربي يحفظهم
كنا بزاف عيانين ومع ذلك قعدت نغير في فاطيمة لي راحت وخلاتني للمدينة الجديدة وقلتلها بلي احنا رحنا لل manage
وكانت اجمل حاجة درتها في وهران
هي اكيد بعدما سرقولها ال port money
ندمت لي راحت و تمنات لوكان راحت معانا خير

وصلى اللهم وسلم على سيدنا محمد

ميرسي سارة

♥♥ عدد المساهمات : 21453 تاريخ التسجيل : 08/11/2010

العفو

♥♥ عدد المساهمات : 21453 تاريخ التسجيل : 08/11/2010

السلام عليكم

في اليوم الثالث لينا في وهران درنا TP كي العادة وكملنا على الثلاثة تع العشية رحنا فطرنا برا ورجعنا للحي الجامعي على 5

طلعنا لل chambre ريحنا وبعدما صلينا المغرب عيطنا لكامل صحاباتنا و تفاهمنا نروحو للمطعم الجامعي بطلب من لبنات تع l'ugel

وعند الدخلة تع المطعم لقينا la chaine حتى للبرا وغير شفت هذاك الغاشي
انقطعتلي الشهية خاطر تفكرت واش صرالي من قبل بصح تع l'ugel قالولنا نقدروا
ندخلو من مدخل خاص (ماشي تع المعوقين طبعا) واحنا تبعناهم ودخلنا معاهم
وبالفعل تعشينا

بعد العشا تفاهمنا نروحو نجتمعو في chembre وحدة ونقصرو سهرنا تم حتى للنص
اللليل واحنا نضحكو على كامل واش صرالنا في وهران وكنت انا طبعا اكثر وحدة
صراولي طوايش ولي كملت عليا كي ماحبيتش نروح مع تع الإتحاد الطلابي الحر
(l'ugel) خاطر حسيتهم بزاااف متشددات بصح في الاخير خرجو ناس كرماء وعشاوهم
عشا مليييح وحتى الصلاة لي احنا صليناها كيما موالف هوما عاونوهم ونصحوهم
يصلو صلاة المسافر ويقصرو في الصلاة وفي بلاصة مايصلو اربع ركعات يصلو زوج

وفي اليوم الرابع بقالنا برك نودعو الشيخة لي قراتنا هذو اربعة ايام وهي
قعدت تسأل فينا على الحاجات لي ما فهمناهمش وكي العادة حتى واحد مارد حسبت
كامل رانا فاهمين قالتلنا صحيتو على المتابعة وحسن الإصغاء وسرحتنا

خرجنا وجدنا قشنا باش نرجعو للديار وانا نوجد في كابتي عيطلي المسؤول وقالي قولي للبنات حتى لل1 باش يجي البيس

لبنات كي وصلهم الخبر قالو نروحو نحوسو شوية وانا حبيت نروح معاهم كاش
مانشري للعايلة رحنا لمارشي قريب من la cité وتماك كل وحدة فينا ووين راحت
انا تلهيت بالحلوة والقاطو وزدت شريت des cadres كتذكار مكتوب عليهم اسمي
وبلي مصنوعين في وهران وفي أي عام وانا قلتلو زيد اكتبلي biotechnologie
مانيش عارفة وعلاه بصح جات في بالي

وبعدها رجعنا مع بعض وتلايمنا كل القسم قدام الحي الجامعي نستناو في البيس
وبدينا نخططو كيفاش نوجدوا رواحنا لرحلة اخرى واخترنا العاصمة هذي المرة
بصح كان لازم خطة باش نقنعو الإدارة الموقرة

وصلى اللهم وسلم على سيدنا محمد

♥♥ عدد المساهمات : 21453 تاريخ التسجيل : 08/11/2010

السلام عليكم

واحنا راجعين من الرحلة كنا عيانين بزاف انا حطيت راسي على الكرسي وقعدت
نشوف في المناظر الطبيعية من التاقة وكانت الشتا تطيح حبيت بزاف هذا الجو
وخاصة واني كنت متوحشة دارنا ونستنى وقتاش نوصل ليها وفي هذي اللحظات
الرومنسية الجميلة صونا التلفون حوست عليه ومالقيتوش في جيبي حوست في الساك
ومالقيتوش تان وفي الاخير لقيتو في ساك فاطيمة خاطر نسيتو وهي لقاتو بعد
ماخرجت وحطاتو في ساكها

خفت بزاف يكون بابا لي عيطلي ومارفدتش عليه خاطر نعرفو مليح كيفاش يتقلق
بصح الحمد لله ماكانش هو كان رقم غريب يبان من خارج الجزائر يبدا بــ 0096
سقسيت فاطيمة من أي دولة يكون هذا قالتلي ماتعرفش قعدت نخمم طريق كاملة
زعما شكون هذا لي عيطلي من الخارج

كي وصلت للدار نسيت كامل حكاية التلفون وبقيت نعنق في ماما واختي ونبوس في
بابا وهو يقلي مانسيتلكش هذيك تع تروحي لوهران على 4 تع العشية من بعد
نتفاهمو عليها وانا نقول في قلبي ( لوكان تعرف بلي رحنا على 5 ماشي على
الربعة تحاوزني) بصح كنت دايرة حسابي لهذا الموقف بالذات وجبدت من ساكي
الحلوة والشيكولا لي أبي مسكين يموت عليها وحتى هذوك les souvenirs عجبوهم
بزاف

من وقت لي وصلت وانا نحكيلهم على الرحلة وكيفاش فوتناها مع انو كانو كل
ليلة يعيطولي في التلفون ونحكيلهم كيفاش فات اليوم بصح عائلتي تحب السمعي
بصري وبما انو في الإعادة إفادة عاودتلهم كلشي وبالتفصيل الممل مع شوية
مونتاج طبعا باش المرة الجاية يسمحلي السيد بابا نروح معاهم

وكي قعدت انا واختي في شمبرتنا وحدنا قلتلها على المقاطع لي درتلها مونتاج
مثل حكاية رقم التلفون لي مديتو للمسؤول لي يقرا معانا اختي مسكينة حبت
تسهر وتكمل معايا الحكايات بصح هذي المرة انا لي رقدت وخليتها وحدها
والصباح كي نضت لقيت بزاف appels في بورتابلي ومساج يقول:

(Salut pour quoi tu ne me répond pas moi c géorge et je veux faire connaissance avec vous)

ما عرفتش كيفاش نرد عليه ولا واش نقلو من وين خرجلي هذا سي جورج

قررت نروح هذا اليوم للجامعة مع انو كنا متفقين كل القسم ندو ايام راحة من
السفر وغير وصلت حوست على لطيفة مسكينة وكي تلاقيتها بدات تقلي احكيلي على
الرحلة وبالطبع لطيفة ماتقبل حتى مونتاج كان لازم نقلها كلشي ونسمع
تعليقاتها لي تضحكني دايما

وبعدها حكيتلها على جورج وهنا كان لازملنا قعدة صحيحة خيرنا بلاصة بعيدة
على الغاشي وقعدنا شافت الرقم قالتلي هذا من لبنان خاطر هي تعرفت على وحدة
لبنانية من الانترنت وعطاتها رقمها لي يبدا بنفس الرمز زدت معاها شوية وبعد
قلتلها نروح للدار وتفاهمت معاها نعيطلها في حالة صرا كاش جديد زعما اذا
عاود عيط

انا غير سمعت بلي الأخ من لبنان عجبني الحال خاطر كنت نبغي بزاف لبنان لي
فيها مناظر تهبل وطبيعتها في الشتا هايلة خاصة كي يطيح الثلج وزيد حتى
ناسها هايلين وظراف بزاف ويجو أغلبيتهم شابين وبديت نتخيل في السي جورج
واحد بوقوس وحطة غير رجعت للدار بعثتلو هذا المساج لي قريتو اكثر من عشر
مرات قبل وبعد مانبعثو

(Salut george, oui j’aime bien avoir un amie de Liban je suis une algérienne et j’ai 23 ans et toi !!)

وبعد شوية وصلني مساج من عندو يقول

(J’ai 40 ans et je suis un décorateur si tu me trouves très âgée que toi ne me réponds plus)

اول حاجة قلتها بعد ماقريت المساج : عندو ربعين سنة اممممم يسمى شيباني

فكرت بزاف واش نرد عليه وهو بدا كل دقيقة يبيبيلي اول مرة كي بيبالي ما
أمنتش كنت حاسبة سياسة ال bipage هذي كاينة غير عندنا في الجزائر بصح راهي
خرجت سياسة international وبعد تفكير طويل دام حتى لبعد العشاء كتبتلو هذا
الرد

(C pas grave ton age ne m’intéresse pas nous somme que des amis)

وصلى اللهم وسلم على سيدنا محمد

مشكورة سارة رانا نستناو في الباقي

♥♥ عدد المساهمات : 21453 تاريخ التسجيل : 08/11/2010

العفو

♥♥ عدد المساهمات : 21453 تاريخ التسجيل : 08/11/2010

السلام عليكم

الصباح عيطتلي لطيفة باش تسقسيني وين وصلت مع اللبناني وانا حكيتلها كلش
بالتفصيل بصح زعفت عليا كي ماعيطتلهاش وقلتلها على هذي الاحداث الجديدة
قلتلها الله غالب و فهمتها بلي المساجات لخارج الجزائر يكلفو غالي وسقسيتها
ايلا كاين طريقة اخرى ماتكلفش بزاف ونقدر نحكي معاه اكثر قالتلي لطيفة
عليك وعلى الانترنت وانا ماصدقت قلتلها يالله ضروك نروحو للسيبار وفتحيلي
ايمايل نمدو لجورج ونولي نحكي معاه من النت

لطيفة مسكينة وقفت معايا ورحنا فتحنا ايمايل والعشية بعثت لجورج ايمايلي وقلتلو

(Salut donne moi ton email SVP et la mien c…………….quand tu sera on line dite moi pour te contacter)

رد عليا

(Mon email c :………….. demain je vis te contacter n’oublie pas de ramener ta photo pour te voir ok !!)

ماعجبنيش الحال كي قالي على التصويرة انا من وين نجيبلو تصويرة وكيفاش رح
يشوفها ماكنتش نعرف بزاف في النت على هذاك بانتلي حاجة صعيبة بزاف وزيد
مانقدرش نمد تصويرتي لواحد مانعرفوش و قلت غدوة كي نحكي معاه نقلو بلي
ماقدرتش نجيبها ولا ماعنديش وخلاص

وجاء الغد كنت نستنى وقتاش يطلع الصباح تفاهمت انا ولطيفة باش نروحو مع بعض
هي تعرف بزاف في الانترنت وحبيتها تعاوني وتكون معايا أما لالة فاطيمة
كانت غارقة في العسل مع السيد لي تعرفت عليه في التلفون وفتيحة كانت ماشية
على الاتفاق وماجاتش للجامعة كيما باقي القسم على هذا ماقدرتش نحكيلهم على
القصة الجديدة وقلت حتى نتلاقى بيهم في الجامعة ونحكيلهم كلشي

وصلنا للسيبار وفتحت بوات ايمايل تاعي لي ماكان فيها حتى contact اجوتيت جورج وقعدت نستنى فيه وقتاش يطل علينا

بصح هو بطى بزاف قلت نبيبيلو وبعد شوية بعثلي مساج يقولي فيه:

(Désolé ma petite j’ai un travail en tripolis je ne peux pas te contacter maintenant)

بعدما قريت المساج كرهت حياتي وحسيت كلي راه يتمسخر بيا كيفاش عندو خدمة
وواش معنتها تريبولي هذي سقسيت لطيفة بصح ماعرفتش قلت فرصة مادام راني قدام
الانترنت نديلها recherch في google وخرجتلي بلي هي مدينة وفي الشمال
اللبناني وكاين مدينة اخرى اسمها tripolis عاصمة ليبيا وتماك عرفت بلي راه
على طرابلس

زعفت ومارجعتلو حتى كلمة زعما بغيت نستحفظ على روحي عشيت خاسرة اكثر وكون غير حكيت معاه

بعدما رجعنا للقراية لقينا بلي جدول الامتحانات تعلق وانا ماكنت مراجعة
والو كنت لاهية مع الأخ جورج لي نهار حكيت عليه لفاطيمة وفتيحة انخلعو
وعجبهم بزاف وقالولي سعدك فاطيمة قالتلي هذي هي المعرفة تع الصح ماشي كي
حالتي تعرفت على واحد من الجزائر نهار كامل وهو مهبلني (زعما ضروك ولاو ناس
الجزاير مايعجبوهاش نظن راهي تحسد فيا وخلاص ربي يستر من عينها)

بعد يومين بعثلي جورج مساج وقالي

(Salut je reviens de tripolis je suis très fatigué maintenant et je ne
veux que dormir demain je serai on ligne toute la journée)

مارديتش عليه خاطر كنت هذاك الوقت غارقة بين كراساتي الامتحانات قربت وكان
لازم نوجد روحي وكي العادة تقاسمت الدروس انا وفاطيمة وفتيحة وحتى رزيقة
العاقلة دخلت معانا وشكلنا الرباعي الخطير كيما سماونا في القسم

وغد من ذاك بدا جورج يبيبي ويعاود وانا ولا على بالي وبعدها بعثلي مساج

(Salut ou es tu !! je suis on ligne tu es fâchée de moi !!!)

عجبني الحال كي حسيتو يحلل وقلت نزيد نتقلش عليه شوية ومارديتش عليه بحتى
كلمة وبعد نص ساعة بدا يعيط خليتو مارفدتش عليه اول مرة والمرة الثانية
غاضني رفدت عليه وسمعت صوتو لأول مرة

وياااااااا شحال كان حنين قالي

Allo tu es bien ma belle !!!

قلتلو

Oui je vis très bien alhamdollah

قالي

Pour quoi tu ne me répond pas tu es fâchée de moi ?

قلتلو وبكل برودة

Non non je suis occupée j’ai des examens la semaine prochaine et j’ai pas assis de crédit dans mon téléphone

هو كان متفهم بزاااف وقالي

A ok bon courage mon ange porte toi bien à la prochain

رديت عليه

Merci nchallah

كي كملت التلفون حست بلي قسيت عليه والسيد غير يسايس فيا مسكين بصح قلت
مليح ليه هكة باش مايسمرنيش مرة اخرى في السيبار café ومن بعد يقلي عندي
خدمة

قعدت سمانتين وانا مع الامتحانات وجورج مسكين كل يوم الصباح يبعثلي مساج تاع

Bon courage

ومرة يقلي

Mon ange ; ma belle ; ma petite

كنت دايما نقول في قلبي ياسلام على الدلع اللبناني وبعدها نتفكرعبارات الشباب الجزائريين

بابيشتي, انوشتي, حنونتي, الحبة تاعي,
فرق كبير والله

وصلى اللهم وسلم على سيدنا محمد

♥♥ عدد المساهمات : 21453 تاريخ التسجيل : 08/11/2010

السلام عليكم

حسيت جورج وقف معايا بزاف وانا في فترة الامتحانات نكون محتاجة فيها لأي
كلمة حنينة باش ننسى القلق والخو هذي المرة الوحيدة لي كنت فيها رايقة
موالف في فترة مثل هذي نكون على اعصابي واي كلمة ندير منها مشكل باش نخرج
الظغط وياويل لي يكون قدامي ساعة الانفجار

كملنا الامتحانات وكي العادة بفضل التعاون والتكاتف والتكافل بينا احنا
الرباعي الخطير قدرنا نتحصلو على علامات مليحة يعني الحمد لله كانت كلها
فوق 5 بصح ماشي اكثر من 10

في هذا الوقت تفكرت بلي عندي بزاف مابعثتش لجورج مساج وقلت لازم نشكروا على وقفتو معايا

(Salut géorge tu me manque beaucoup j’ai terminée mes examens merci bien
pour tes messages d’encouragement elle ma vraiment aider pour passer
une très difficile période)

وهو فرح بزاف بالمساج ورد عليا تم تم

(Tu me manque aussi ton message elle me fait contant psq je commence a cru que je te perdu)

الله الله قلت في قلبي بدا الغزل اللبناني لي على اصلو واش معنتها بدا يحس
بلي فقدني زعما هو وقتاش كسبني وزيد واش بيني وبينو حتى يحس هكة انا لحد
لأن نتعامل معاه كصديق وخلاص وعمري مافكرت فيه غير هكذا كاين بزاف حاجات
تخليني مانفكرش اولا بعيد بزاف وثانيا كبير عليا بزاف وثالثا يبان من اسمو
مسيحي والله اعلم

علاقتي مع جورج كانت ثابتة دايما ومساجاتنا ماكانتش تجاوز كلمة توحشتك وma
belle وmon ange لي هو برك يقولهم اما انا مانقدرش نقلو أي كلمة نخاف يتعلق
بيها ويحسبني راني باغياتو صح

جورج مسكين الحاجة لي يديرها يبعثلي مساج يقلي عليها مرة يقلي راني ندير في
ski ومرة يقلي راني مع صحابي ناكل في pizza ومرة يقلي فوت الفالانتاين مع
la cliques تاعي في الجبل وانا ماكانش عندي لا ski ولا كليكة نطلع معاها
للجبل باش نفوت الفالنتاين بصح كنت تان نقلو على الحاجات لي نديرهم مثلا
كنت في عرس بنت خالتي أو رانا راقدين في الحوش وهذي خلعاتو بزاف وحسب
ماعندناش دار بصح فهمتو بلي بزاف جزايريين في الصيف يرقدو في الحوش هربا من
السخانة وكي قالي وعلاه مايشعلوش climatiseur ويرقدو الداخل قنعتو بلي
احنا نبغو الحاجة الطبيعية والرقدة في الحوش تخليك تنوض ناشط وماتمرضش
مسكين أمني وبدا حتى هو يرقد فوق السطح

وصلى اللهم وسلم على سيدنا محمد

هههههه نستعرف بيها خلاتو يرقد في الحوش
فحلة مليحة ليه
مشكورة شهرة

♥♥ عدد المساهمات : 21453 تاريخ التسجيل : 08/11/2010

خخخخخخ شفتي ياك حنا الخرطي من عندنا خرج

♥♥ عدد المساهمات : 21453 تاريخ التسجيل : 08/11/2010

السلام عليكم

فاتت الايام وعلاقتي بجورج كل يوم تزيد تقوى اكثر واكثر انا بقيت دايما
نعتبرو مجرد صديق ومرات نتمنى لوكان كان اصغر في العمر ومسلم بصح هذو زوج
اسباب كانت دايما تخليني نتراجع كلما راح عقلي من او من اما هو ماكان عندو
حتى مانع
مرة بعثلي مساج قالي فيه حياتي درتلو سعدو في يدو وقلتلو كيفاش تسمح لنفسك
تقلي هكة انا مانبغيش هذي الهدرة وهو انخلع مسكين وبدا يقلي:
شو عملتلك انا شو قلت اذا مشان حياتي هاي كلمة نقولوها دايما لاي من كان ليش راح فكرك لبعيد
وهذاك الوقت حشمت على روحي وتفكرت بلي هوما اصلا هدرتهم حنينة وكلمة حبيبتي
وحياتي يستعملوها مع كامل ناس وقلتلو اسمحلي احنا في الجزاير ماعندناش هذي
العقلية وهو قبل اعتذاري وتفهم الموقف كثر خيرو

بصح بقا كل مرة يقلي كلمة او زوج يمعنيلي بيها انو يبغيني و انا نخلط النية
مع الهبال ونلعبها مافهمتوش نخاف نقولو وعلاه قلتلي هكة يقلي ماقصدتش واش
فهمتي
حتى جاء الصيف والسيد جورج زاد تعلقو بيا وبدا يقلي حاب نجي للجزاير وغير
سمعت هذي الكلمة وجهي صفار وحمار وحكمتني الحمى قلت وين رح يجي هذا مهبول
عندبالو رانا في فرنسا كلش نورمال لوكان يحكمو بابا ولا خويا يقطعولو رجليه
حاولت نفهمو بلي احنا مختلفين عليهم في العقلية بصح هو كان مصر يجي
ويشوفني أول مرة حس من كلامي اني مانيش باغياتو يشوفني بدا يقلي انا
مايهمنيش الشكل زعما كلي انا راني حشمانة بشكلي

بعدما لقى جورج اني مازلت رافضة فكرة يجي للجزاير قالي راني باغي نهدر معاك
لازم تحددي موعد نحكو فيه في الانترنت وانا حددت الموعد ورحت في الوقت
كانت هذي اول مرة نحكي مع جورج في الانترنت وهو لقاها فرصة با ش يشوفني
قالي شغلي الكاميرا وانا كنت مانعرف والو قلتلو اوكي ومن بعد رحت نجري لمول
السيبار وقلتلو معليش توريلي كيفاش نشغل الكاميرا ورالي ورجعت شغلتها
وشفتو وشافني قالي بلي عجبتو وماكانش يتوقع بلي نكون هكة بعدما لقاني نتهرب
من فكرة اللقاء ورفضت اكثر من مرة نبعثلو صورتي حسبني معوقة اما انا لقيتو
عكس ماتوقعتو تماما يعني ماشي شيباني كان راجل رمادي يعني شعرو لا اسود
ولا ابيض وهذا الشي خلاه يبان بزاااف شباب وانيق
بعدما شافني زاد اصرار جورج باش يجي لعندنا وانا حرت كيفاش نقولهالو بلي
احنا خاطينا هذيك العقلية قلتلو الجزائر بيبانها مفتوحين لكل الناس بصح
ماتتوقعش مني نجي ونتلاقى بيك او نستقبلك في دارنا
قالي : بس انا جاي مشانك انتي
قلتلو : علاه
قالي: لأني بحبك......
انا سكتت وهو كمل وقال: وحاب اجي للجزاير واخذك معي على لبنان ونعيش سوى قلت في قلبي يا يما على التبهديلة لوكان يسمعو جوارينا يهبلو

و بعدما استرجعت وعيي وفطنت من الصدمة بدا عقلي يخدم صح وجاوبتو: بصح جورج انت مش مسلم
رد عليا: وشو المانع هيدا مش مشكل كل واحد حر بديانتو
قلتلو : لا انت غلطان في هذي النقطة احنا كمسلمين مش مسموح للنساء الزواج بغير المسلم
وهو ماعجبوش كامل الحال قالي: هذا تفكير محدود ومش صح ابدا احنا عندنا
بلبنان عادي مش مهم شو هي ديانتك احنا كلنا عباد لله وكلنا مثل بعض
اكيد ماكانش رح يغير قناعتي لي اكتسبتها من ديني واهلي ومحيطي وجاوبتو
جورج انت لازم تعرف ان هذا الكلام مش من راسي او شي خاص بينا احنا
كجزائريين هذا شرع ربنا ومن شروط صحة الزواج في الدين الاسلامي ان يكون
الزوج مسلما الزوجة مايهم شو ديانتها بس الزوج لازم يكون مسلم لأن القوامة
بيد الرجل ومفروض على الزوجة تطيع زوجها وتكون تابعة ليه في كل شي
هذاك الكلام ماقنعش بزاف الأخ جورج وقفلنا المحادثة وكل واحد مقتنع بوجة نظروا
بعدما رجعت للدار وصلني مساج من عندو يقول
تمنيت كتير تتطور علاقتنا وتكبر بس صدمني تفكيرك وتعصبك ياريت تراجعي نفسك انا لسه متمسك بيكي

مسكين هذا جورج لوكان يعرف بلي انا مش مجرد اختلاف الدين لي خلاني نرفضو
ولو انو كان هذا السبب الرئيسي لي من اجلو مافكرتش منذ البداية نتعلق بيه
بصح فرق السن والبعد الثقافي والجغرافي كل هذي الاسباب خلاتني نقولو لالا
فكرت بزاف وبعدها رديت عليه

انا مش متعصبة بس تربيت ونشأت على الدين والعقيدة ولو وقفت في يوم في مفترق
طرق ألجأ دايما لديني لي ينورلي الطريق ويخليني اعرف الطريق الصحيح

اختلافنا في الدين مايفرقناش ابدا بس كمان مايسمحلناش نرتبط انا احترمك واحترم دينك ياريت تحترم قراري

كانت اخر كلمات اكتبها لجورج بعدما رد عليا هو تان اخر رد وقال:

رح احترم قرارك ودينك بس رح ابدا ابحث في هذا الدين لي بيتحكم حتى في قراراتك الشخصية وبيسيرلك كل حياتك

♥♥ عدد المساهمات : 21453 تاريخ التسجيل : 08/11/2010

السلام عليكم

بعد ما انقطعت علاقتي بجورج حسيت بفراغ كبير[ندعوك للتسجيل في المنتدى أو التعريف بنفسك لمعاينة هذه الصورة]
كان على الاقل شاغل مكان وقت في حياتي بصح هذا الشي ما أثرش عليا وقدرت
نجيب العام بلا حتى ماندخل synthese وهذي كانت اول مرة نجيب فيها عامي من
غير ما نلجأ للوقت المستقطع يعني الامتحان الاستدراكي ماحسيتش كامل كيفاش
فات العام
في ايام الصيف الطويلة فكرت بزاف كيفاش جاب جورج رقمي وندمت لأني ما
سقسيتوش هذا السؤال قبل ما تنتهي العلاقة وبدات الايام تفوت طويلة ومملة
حتى كي مرة قررت نروح انا واختي للسيبار نشوفو شوية اخبار تع الناس
والفنانين وخاصة ناس ستار اكاديمي وتان بغيت نديفولي على روحي ونسترجع
ذكريات ايام جورج ياحسراه[ندعوك للتسجيل في المنتدى أو التعريف بنفسك لمعاينة هذه الصورة]
وكي فتحت بوات ايمايل لقيت رسالة من عند جورج كاتبلي فيها
مرحبا يمكن انتي تكوني نسيتيني وبكذب عليك اذا ما قلتلك اني بحاول انا كمان
انساكي بس حبيت اكتبلك هاي الكلمات قبل ما كل واحد يقفل ذاكرتو ويمحي منها
صورة الثاني لاني حسيت اني باخر مسج كنت قاسي عليكي وحملتك مسؤولية قرار
ماكنتي انتي لي قررتيه كان دينك هو لي قررلك ياه من قبل حتى ماتولدي بقلك
هيك لأني بجد بديت اسأل وهيدا اول شي عرفتو المهم رح قلك انو انبسطت كثير
بالايام لي تعرفت فيها عليكي لاني بحياتي ماتوقعت احب وحدة هيك بس من
كلامها ولا توقعت ان الرقم لي شكلتو لأتصل بصديق تعرفت عليه هنا بلبنان
يطلع غلط ويطلع رقمك انتي
اشكرك لأنك خليتيني اعيش لحظات حلوة بحياتي ولأنك سمحتيلي أكون بيوم من
الأيام جزء من حياتك وحتى لأنك سمحتيلي اكون ضمن ذكرياتك حبيت الجزاير من
خلالك لأنك كنتي أجمل نافذة طليت منها على هذي البلد الحلوة وحبيت النومة
في الحوش مثل ماقلتي لأنها طلعت بجد صحية اكثر مارح اطلب منك تردي على
رسالتي بالعكس ياريت ماتردي لأني بتعلق حتى بكلماتك العادية والبسطية

مسكين جورج والله بعد ماقريت رسالتو غاضتي وجاتني الدمعة[ندعوك للتسجيل في المنتدى أو التعريف بنفسك لمعاينة هذه الصورة]
ولوكان ماشي كنت في وسط الغاشي وجاتني حشومة لوكان بكيت اغلقت الرسالة
والبوات ومعاهم كل شي كان يربطني بجورج مسحت رقمو من البورتابل ومن عقلي
وقررت نواصل حياتي

فات الصيف وجاء الدخول الجامعي للسنة الرابعة كنت فرحانة بزاف لان بعد
مانخلص هذي السنة تبقالي سنة واحدة ونرتاح من الجامعة لي حسيت نفسي تعبت
بزاف فيها هذي السنة كنا من البداية معولين على اننا نفوتوها احسن سنة على
خاطر كنا عارفين بلي العام الجاي مارحش يكون عندنا الوقت باش نحوسو ونخرجو
رح يكون قدامنا memoire لازم نوجدوها
رحنا لخميس مليانة وللجزائر العاصمة وكانت رحلة العاصمة الأجمل لأننا كنا نستناو فيها من العام لي فات
وجهتنا كانت ل institut pasteur كنا بزاف متمنيين نروحولها وبعد ما وصلنا شفنا شوية وقالولنا كملت الزيارة[ندعوك للتسجيل في المنتدى أو التعريف بنفسك لمعاينة هذه الصورة]
يعني كنا مزال حتى ماريحناش من تعب الطريق وعلى هذاك قررنا باش مانرجعوش
بلخف لديارنا و قعدنا نقولو للشيخ لي كان مسؤول علينا في الرحلة باش يدينا
نشوفو مقام الشهيد او يدينا لشاطئ سيدي فرج وهو كان متفهم على خاطر حتى هو
ماكانش باغي يرجعنا بلخف بعدما كنا متوقعين نقضو كامل اليوم في institut
pasteur على هذاك قالنا انتم خيرو لي تحبوها واحنا خيرنا سيدي فرج طبعا[ندعوك للتسجيل في المنتدى أو التعريف بنفسك لمعاينة هذه الصورة]
الشيخ مسكين دانا وعلى مسؤوليتو وقالنا ماتبعدوش او تديرو طوايش باش ما تخلونيش نندم لي بغيت نحي على خاطركم
واحنا وعدناه بلي نقعدو عاقلين
انا كنت بزاف كارهة حياتي وبغيت نرجع للدار لوكان ماشي كل القسم اصر على
سيدي فرج قعدت في بلاصة وحدي ومقابلة البحر تمنيت لوكان نلقى كيفاش نركب في
بابور ونروح نحوس حتى شفت قدامي وحد الفلوكات سقسيت واحد كان واقف تم قالي
هذو يكروهم يدوك يضربو بيك دورة وتحويسة في البحر ويرجعوك رحت جبت فاطيمة
وفتيحة ورزيقة وخلصناه وركبنا كانت تحويسة تهبل والشيخ مسكين كان قاعد
ويراقب في كل مجموعة من البعيد وما أمنش عقلو كي لقانا احنا الاربعة في وسط
البحر[ندعوك للتسجيل في المنتدى أو التعريف بنفسك لمعاينة هذه الصورة] انا ريشتلو من بعيد وقلتلو بقى على خير الشيخ رانا رايحين نحرقو تهلى في الجزاير
قعد الشيخ طريق كاملة وهو يضحك علينا ويقلنا والله ما امنت انتم تخرجولي
هذيك الخرجة زعما انا كنت نعس فيكم فوق الشط حتى لقيتكم في وسط البحر عندو
الصح لي قال النسا مايتعسوش

وصلى اللهم على سيدنا محمد

مشكورة سارة

» فتاة جزائرية في أمريكا
» يوميات هو وهي في رمضان
» قصة مضحكة جدا جدا جدا