محتاجة دعواتكم

السلام عليكم
أولا اشكر ادارة قصر الشوق على هذا القسم مع السماح بترك الهوية الاصلية مجهولة
اليوم صرالي مشكل مع خطيبي و انتهى بانو بعثلي ميساج كتب فيه ماتزيديش تسقسي علي
وهذي الجملة خلات راسي يحبس، هو في الواقع انسان متفهم ياسر وماعلاباليش واش بيه اليوم طاح عليه هبالو
المهم مازدتش معاه الهدرة ورجعتلو ميساج انو عندو الحق في كل كلمة يقولها و اني نحبو مهما يقول
علابالي يحبني بزاف مي ماعلاباليش واش راهو قاصد بهاذي الكلمة اذا كانت كلمة قالها في لحظة غضب ولا ناوي ابطل الخطوبة
ادعو ربي يفرج ويفوت هاذ النهار على خير
وشكرا

ان شاء الله ربي يحل المشكلة وما يكونش ناويها صح

ممكن لحضة غضب برك مدام قلتي صرا مشكل


وربي يهدن النفوس

شكرا ليك اختي

ختي الانسان كيما يتقلق قادر يقول اي حاجة

ان شاء الله ما يكونش قاصد و ترجع الامور بيناتكم كيما كانت و خير

ربي يسلكها على خير ممكن كيما قالو الاخوات لحظة غضب
لازم الراجل كي يكون مقلق ماتناقشيش معاه بزاف باسك يبدا يهدر هدرة ممكن تقيسك
وهو من التقلاق لي يهدر هكاك المهم اختي نتي خليه حتى يتكالما
علابالي حنا نحبو نفهمو كلش بلخف والراجل الحاجة لي يكرها كي تبداي
تقوليلو وعلاش وعلاش وعلاش يزيد فالحاجة وتكبريها في باطل خليه براحتو
كلي حاجة ماصراتش وبربي كلش يعود نورمال ماتقلقيش روحك سيي اليوم كيفاش تلهي
روحك باش هو يبرد ويولي لطبيعتو ونتي باش ماتقعديش تشغلي
راسك بيه وان شاء الله مايكون غير الخير

ماتقلقيش روحك اختي
كيما قالولك لبنات حالة غضب
والانسان كي يغضب يبدا مش عارف روحو واش يقول
خليه حتى يتهدن وماتكثريش الهدرة معاه
ان شاء الله مايكون غير الخير و ترجعو كيما اللول واحسن

ما تتقلقيش اختي و خليه على راحتو هادو الايامات ما تسمطيش عليه الراجب راهو فمفم يكره وحدو و يولي هو اللي يعيطلك وشنو انتي ثقلي روحك و خليه يريح شوية و انتي تان ريحي راسك من التخمتم و اشغلي روحك بحاجة اخرى
ربي معاك ان شاء الله و يفرج عليك و رانا ندعولك كامل ان شاء الله دعوات غيبية باه ربي يتقبل

ماتقلقيش اختي مايكون غير الخير ان شاء الله وكيما قالو لبنات زعاف برك ويفوت

ربي يعدل الاحوال خصوصا واني حاسة بيك ربي يهديه ويصلح بيناتكم

ان شاء الله نسعمو خبر مليح

شكرا لكن يا بنات على وقفتكم معايا الحمد لله المشكل اللي صرالي مع خطيبي اتحل في هذاك اليوم وقالي كي نتقلق ماتديريش كلامي في بالك
ربي يعطيكم ما تتمناو ان شاء الله

الحمد لله اختي ربي يصلح احوالكم ان شاء الله ويهنيكم يارب

الحمد لله فرحتينا
ان شاء الله يكون هدا اخر خلاف بيناتكم

الحمد لله مزية ما كبرتيش الحالة و عليك تساعفي و خلاص
ربي يكمل بيناتكم و يبعد عليكم المشاكل يا رب